財經評論 2016年3月30日

財經評論 2016年3月30日

財經評論：內地樓得個殼


■盲目刺激新開工、新投資，最終令內地樓市庫存難滅。　資料圖片

近年港樓多怪名已見怪不怪，中國情況就更甚，令到國務院「全國地名普查領導小組」兼民政部部長李國立批評，地方政府為街道亂改名，是「盲目貪大、媚洋、求怪」，要重點清理住宅區、大型建築及街道等的「大、洋、怪、重名」不守規範名字。

崇洋媚外當然要禁，否則難保強國之名，但中國股樓向來未出發先興奮，樓盤亦如事。好似深圳作為高科技企業集中地，雖則未追到矽谷(矽谷)，但好多樓盤均以矽谷為名，好似「君華矽谷」及「中亞矽谷海岸」。

大國崛起令中國客瘋湧出國消費，中央想留住內需，可能開發商都有政治任務，國人欲感受異光風情亦不用一定出國的，留在國內買庫存一樣可以，因廣州亦有「保利．西雅圖」、深圳有「英倫名苑」、瀋陽更有「巴黎公館」。

其實樓盤名追求高大上已屬尋常，近年更有以水果入命，好似廣州「雅居樂萬科熱橙」、成都「合能橙中心」，都是在售新盤，未知是否有大健康概念？

樓盤名誇張不要緊，名過其實才真令人困擾。皆因記者不時獨自返大陸睇樓，試過坐的士去廣州睇樓，宣傳單張明明寫著「一小時生活圈」，想必快過香港上深圳。哪知司機大佬默默開約一個小時，卻載我去不毛之地，放眼只有泥頭車和公路，對方好心勸句「你早點走呀，附近很難找車回廣州……」，再睇完樓盤的金碧輝煌，不得不嘆句金玉其外，敗絮其中。

其實城市內土地稀缺多年難解，加上中央提倡拉近各區域經濟實力，以優惠吸引開發商去城市周邊發展，藉此大量賣地兼大興土木做基建，做靚條數。但經濟實力卻非金錢、增加移民就可提升，城鎮化、X小時生活圈等名目口號當然吸引，但地方更需找到經濟均衡及長遠發展的支持點，否則盲目刺激新開工、新投資，最終庫存難滅，鬼城亦難消。

記者：方楚茵

財經評論 舊文

來源 source: http://hk.apple.nextmedia.com