中環在線：本月沙田舉行 限320位粉絲
熊本熊首來港開生日會
■一田莊偉忠（左）聯同熊本縣政府香港代表事務所所長西山英樹（右）宣佈，3月尾會搞個熊本熊生日會，同熊粉見面。 江靖然攝
來自日本熊本縣嘅吉祥物KUMAMON（熊本熊）喺香港有唔少粉絲，最近佢又有新搞作喇！為咗慶祝熊本熊5歲
生日（3月12日），一田百貨獲熊本縣官方授權，於本月26日及27日，喺沙田店為佢舉辦首個海外生日會，熊本熊仲會親身上台表演㖭！
推獨家精品
其實熊本縣及其他日本城市，每年都會舉辦KUMAMON Fans感謝祭，今次係熊本熊第一次走出日本，去到外地正式慶祝生日。人數有限，只有320位粉絲可以同熊本熊近距離接觸咋！
不過入唔到場都唔使咁灰，由一田舉辦嘅「KUMAMON Fans感謝祭2016 in香港」，喺3月22日至4月5日期間，全線分店都會推出多款獨家限定精品。
除此之外，一田最近仲同富邦銀行推出海外首張KUMAMON肖像信用卡，上面印咗熊本熊個萌樣，真係幾可愛㗎！難怪富邦（香港）高級副總裁兼消費金融部主管谷祖明都話，食正時下年輕人口味、大受歡迎，短短幾日已經有近萬個新客戶申請喇，仲話幫公司拓展咗年輕客群！
一田行政總裁莊偉忠話，足足用咗幾年時間，先說服到熊本縣知事蒲島鬱夫，批准佢哋發行呢張信用卡，仲提到自己好欣賞蒲島先生好有頭腦㖭。莊偉忠又盛讚財爺曾俊華講說話好得體，就算俾人掟蕉、送棺材，佢依然好淡定，又話財爺同自己一樣咁撐「本土」，好似之前世界盃外圍賽，就算翻牆都咁支持。
李華華
mailto:LiWaWa@AppleDaily.com
李華華
LiWaWa@AppleDaily.com
中環在線 - 李華華 舊文
來源 source: http://hk.apple.nextmedia.com
