阿爺想繼續放水
2016年03月04日
內地早前降準，期望可以增加市場資金，市場估計內地仲會有其他措施放水，務求穩定經濟，喺憧憬貨幣政策出招之際，港股經過周三大升，昨日略為調整，等候假期有無相關消息公佈。
上調貨幣供應目標
市場估計會有放水動作，因為全國人大會議喺周末就會召開，
外電引述總理李克強將在政府工作報告中，把今年貨幣供應M2增長目標上調至13%，配合貨幣政策更偏寬鬆，但通脹目標則維持3%，希望物價回升能紓緩企業的盈利壓力。
內地厲行「供給側」改革，去除過剩產能，為了抵銷對經濟的影響，貨幣政策可能傾向寬鬆。總理李克強會在周末全國人大開幕時的政府工作報告中披露相關訊息，早前發改委已率先透露，經濟增長目標將首次定於區間的6.5%至7%。
雖然內地有心放水，不過喺炒作消息時都不能太忘情，皆因全球經濟係互動，特別係人民幣入籃後，人仔匯價點都唔能夠唔理外面。
我喺網誌有提到，據聯邦基金期貨交易資料顯示，兩日之前，市場認為聯儲局12月加息機會只有30%，兩個星期前，市場認為12月加息也只有18%！家有聯儲局成員都放聲氣，話美國經濟良好，唔可以排除美國繼續加息嘅機會。
美國公佈的數據，無論係就業抑或係樓市都顯示經濟勢頭仍然向好。陸羽仁有朋友剛由加州返嚟，佢話成個加州樓價都好靚仔，因矽谷帶動的高新產業令區內物業需求急增，呢個情況同金融海嘯後加州一度出現財政危機相去甚遠。
美國喺次按前，借助樓市帶動經濟搞出一個泡沫，最後爆出災難性後果，事隔七年，樓市再度起動，但至今為止仲係相對健康。如果美國樓市同消息繼續升溫，加上通脹預期增加，咁就算中國經濟唔掂，都唔能夠排除美國加息嘅機會。如果美國加息，內地又係咪可以唔理，繼續放水催谷呢？咁做對人仔匯價有乜影響呢？
美國加息係遠憂
不過，陸羽仁所講嘅，就算唔係遠憂，都係中線嘅憂慮。目前市場仲係睇緊兩會有乜可借炒作的藉口，大家繼續搵食。只係搵食之餘，大家唔好忘記背後仲有陰霾。
雖然上月財新服務業PMI下滑，同時評級機構穆迪繼周三降中國債務評級展望後，周四踩多腳削63間中資企業評級，加上北韓射短程導彈回應聯合國實施新制裁，但港股都算硬淨，最終下跌逾60點收市。恒指收報19941點，跌61點；國指收報8390點，上升16點，成交金額717.16億元。
大市輪流炒，部份礦業股受追捧。鐵貨(1029) 急升13.74%報0.149元；哈薩克礦業(847) 大升7%報17.8元；重鋼(1053) 升11%報1.1元；洛陽鉬業(3993) 揚7%報1.35元。
兩會關鑼，身為人大嘅騰訊(700) 首席執行官馬化騰就提出五個建議，包括分享經濟、網際網路醫療、數字內容產業、網際網路生態安全和「網際網路+」落地措施等。
佢話，在關於進一步推進「網際網路+」行動計劃落地的建議中稱，目前網際網路作為資訊能源的基礎設施地位明顯，像水和電一樣融入人民生活，並催生出如網際網路金融、線上租車等新業態。網絡發展係近年內地政府每次重大經濟會議必提的議題，睇相關股份又會唔會借機會炒作一番嘞。
陸羽仁
金融High Tea 舊文
來源 source: http://hdfin.stheadline.com
