收市閒情：我與老婆要「分居」
■港樓價大跌，得寶花園跌穿300萬元，比去年8月跌足三成。 資料圖片
（由真人真事改編）
約一年前左右……「仲有半年就結婚喇，到𠵱家講親買樓你都愛理不理，係咪想瞓街？」未婚妻阿怡又拎番呢個topic講，唔係我唔想買，係我買唔起。我知你實寸我，月入幾皮嘢都
買唔起樓？錢係儲到啲呀，但結婚使走一大截，之後咪玩完囉。本來拎積蓄去做首期都掹掹緊，𠵱家唔見咗一截就唔夠喇。
樓價就好似中環的士佬咁，佢係唔畀你上車就唔畀你上，就算你點追都冇用。連淘大隔籬個得寶，實用300呎都冇，都要400幾萬，仲高竇過啲的士佬。
所以話中國哲學家真係冇得頂！莊子喺《庖丁解牛》講過：「以有涯隨無涯，殆已。」幾千年前嘅莊子，竟然令我明白，死捱爛捱追無頂嘅樓價，死硬！所以幾時先係買樓時機？等樓價跳崖就係買樓時機！
望住阿怡嬲豬嘅表情，我正想發表呢個偉論，點知又俾佢搶閘：「我知買唔起住，一係租住先啦。」「但如果拎咗去交租，我哋仲點儲錢買樓？」佢應該真心嬲：「咁又唔得，咁又唔得，我哋結咗婚，分居喇！」
OK喎！我話：「唔係冇得諗！」「你癡咗線？」「你聽我講，叫你同我屋企人入粉嶺住，日頭港島返工，怕你辛苦，不如你結婚後住喺娘家先。我努力啲儲多陣錢，等樓價跌再買喇。」阿怡好火地問：「咁結嚟有咩用？」「有用！代表一個承諾。就好似一部連咗Wifi嘅電話，佢哋都唔係黐住，咪一樣上到網。」
＊＊＊
憑我三寸不爛之舌，成功說服阿怡。𠵱家我哋結咗婚半年，我住粉嶺，佢住將軍澳。好多人問我婚後生活有咩唔同，老老竇竇，唔係見到隻戒指，我都未必醒起我結咗婚。但真正嘅災難係，每次上外母屋企都好似上陣殺敵，江湖總會掀起腥風血雨，今日……
「衰女，你做乜又轉台。」見到外母咁講，就算幾想開大個電視，用YouTube睇周浩鼎喊，都死死地轉番去TVB，不過事實係我睇咩台都唔重要，「講真，屋企又細，電視就得一部，阿怡就鍾意睇YouTube，我就要睇TVB，遲嚇仲話多個台，你話點分呢？」冇錯，係一個局！我望一望外父，佢竟然起身行入房。阿怡就低頭，主動開聲：「放心啦，我哋有分數。」作為男人，世界末日都要面對：「外母，放心，樓價一跌我哋就買樓。」「唔係話逼你，不過你話樓價跌，𠵱家咪跌緊，仲唔買？」我冇出聲，點知佢繼續：「你係咪借啲意唔一齊住，出去搞搞震？」
你可以質疑我唔買樓嘅決定，但唔可以質疑我對阿怡嘅專一！「夠喇！你估我唔想有新婚生活，同阿怡一齊住咩，我好想呀！我真係有諗過租算，但租越嚟越貴！係呀，樓價係跌呀，得寶仲跌穿300萬呀，但我點敢買呀？同上年8月比跌足三成呀！反正都等，點解唔畀我等我一陣呀，等佢跳崖我就買！」
我忍唔住爆了，我後悔我嘅EQ低，因阿怡哭了，佢好激動：「樓價升，你話儲錢，要分居！樓價跌，你又話要等。你到底係唔係唔想同我生活！」女人，之後梗係奪門而出。
＊＊＊
鬧劇過後一年，我終於等到，樓價真係跳崖，成為得寶對面個德福業主。至於老婆呢？早就頂唔順，離開咗我，仲記得佢臨走時同我講：「連咗Wifi嘅電話，一離開咗間屋，就上唔到網，等如冇用。」望住屋企部電視，開住中產味好濃嘅Netflix，莊子句嘢應改為：「予有捱，予無捱，殆已。」捱到又好，捱唔到又好，總之你如果為層樓失去生活，等如，死咗。
今日，我流咗一滴眼淚，係為咗香港人而流。
千頌C
http://fb.com/winbigwok
《趣BLOGBLOG》暫停一周
千頌C
收市閒情 - 千頌C 舊文
來源 source: http://hk.apple.nextmedia.com
