雙重虛火市
2016年03月03日
美股VIX恐慌指數連日回落後，果然見到美股回春，杜指周二大幅反彈，帶動港股一度重上兩萬點，二月份剛過就先夾一夾淡友。
呢次夾淡夾得比較應，可以話係中外維穩力量齊齊發功的後果。二月全球股市腳軟，尤其新興市場最得人驚，搞到連銀行股都話驚油價急插被人狂
質，喺咁動盪環境下，無論係央行定石油組織，都要做啲嘢維穩。同一時間，內地召開兩會之前，阿爺先炒咗中證監主席肖鋼祭旗，跟住降低存款準備金率托市。喺幾個因素暫時有無形之手頂住下，搞到外國投資者都好似對中國有番啲信心。港股呢個似樣反彈，我會叫佢做雙重虛火市。
放水托樓 市況升溫
何謂雙重虛火呢？一重係內地放水，令外圍感覺良好，減低對內地硬着陸的憂慮，使歐美股市反彈比較有力；第二重係內地樓市點起。由於內地樓市較熱，所以內地股市都有啲火氣。
點解呢兩浸火話係虛唔係實呢？主要係內地出招放水兼托樓市，長線係咪可以推番郁經濟其實未知，我就有少少擔心囉。
不過，唔好聽到話虛火，就睇死佢，以為一定炒一、兩日就熄，有可能佢會持續一段時間，升勢似模似樣。外圍的虛火能否持續，一個關鍵時刻係三月中聯儲局會議，若然聯儲局明示有排唔加息，就可以再彈多一番。而內地的虛火，也可能由於樓市夠旺，可以炒番高少少。
個市要反彈，就懶理評級機構穆迪將中國政府信用評級展望由「穩定」下調至「負面」，恒指在外圍帶動下，愈升愈有，升穿兩萬點大關。恒指收報20003點，飆升596點；國指收報8374點，上揚305點，成交金額927億元，全日有近千四隻個股錄得升幅。華潤啤酒(291) 平價買入餘下49%華潤雪花啤酒股權，股價一度狂升35%，收造15.1元，仍升18%，是表現最醒藍籌股。又有市場再度憧憬「兩會」將有利好基建政策出台，水泥股再受追捧，安徽海螺(914) 勁升10.6%，造18.34元，為升幅最大國企指數成份股。又有地產股派高息，鷹君派特別息2元，昨日股價即升番咁多。
傳粵放寬港澳買家買樓限制，個別內房股急飆。華潤置地(1109) 揚6.6%，二線內房股表現更標青，首創置業(2868) 大升11%，報3.13元；遠洋地產(3377) 爆升15%，報3.91元。
喺升市中，大行唱好個別內房股德銀發表報告，讚富力地產(2777) 2月銷售額大升1.13倍，達31.2億元人民幣，合約面積大增1.28倍，均價就下跌6%至每平方米11268元人民幣。該行認為，雖然面對農曆新年假期影響，但富力銷售依然強勁，跑贏同業。
內房股未諗長先短炒
德銀認為，富力高負債仍是市場關注點，由於集團已發行人民幣債，有助紓緩市場對集團的財務關注以及降低財務成本。現時該股息率達10.4%，息率明顯吸引，加上集團進一步財務重組，估計有助增強派息及盈利能力，維持「買入」評級。
呢期阿爺想借樓市穩住經濟，令最近樓市非常熱鬧，內房股成為博反彈的焦點板塊之一。回想去年，中央想借催谷股市，擴大企業融資渠道同刺激消費，可惜「政策牛」行到一半夭折。家中央又轉行托樓市谷經濟的招數，呢招缺點係無新意，令人擔心呢隻「樓市政策牛」，會谷出資產泡沫同大量缺乏效益的建設；好處就係效果容易預期，短期可以見效。
中央再谷樓市，係咪可以解決經濟增長缺乏動力，家無人知答案，但如我在周一所言，內房股有理無理炒咗先，尤其跌得殘的二三線內房股，單日已炒高一成、半成，扑中都幾和味，所以現在買股唔應該抱住長線唔放的心態，而係短線博反彈，有心理準備佢隨時掉頭，戴住鋼盔走番兩轉。
陸羽仁
金融High Tea 舊文
來源 source: http://hdfin.stheadline.com
