金手指 - 孫柏文 2016年4月26日
金手指：不問價追電盈
■唔單止係股民，睇科技趨勢嘅人甚至用戶，都對電盈旗下的新免費電視頻道ViuTV有好感。 資料圖片
「數碼港？掃咗先講喇！」好多年前，孫柏文啱啱入行做分析員時，有日約隔籬資產管理部嘅前輩食飯，咁我問佢當年一浪又一浪泡沫時係點。如九十年代初新興市場、97年紅籌、千禧年科網等。
而講到由1蚊升到28蚊，最後食埋香港電訊嘅盈科數碼動力，即今日嘅電訊盈科（008），佢就用呢篇文嘅第一句去形容當時啲人掃貨心態。
之後點？由我今日作為「財經演員」角度望，由佢喺28蚊開始跌跌跌之後，近乎冇人（用真名）敢推介佢。無它，可能因為我哋呢班「財演」個個睇到前輩「陸叔」陳永陸嘅經驗。
當年28跌到穿9蚊時，陸叔話買得，啲網友冇聽曬陸叔講嘅細節，佢話短線博反彈，網友老屈佢，講咗佢好多好多年。點都好，呢隻「8號仔」真係令好多人百感交集。
今日，叫大家不問價追電盈，係因為自千禧年後，隻「8號仔」第一次有嗰種人同人講嘅buzz。仲要唔單止係股民，睇科技趨勢嘅人甚至用戶，都對該公司旗下產品如新免費電視頻道ViuTV有好感。千禧年留下之血腥味，終於煙消雲散。
其實，ViuTV現成績遠比好多人想像好。雖然你話收視都係單位數，不過最緊要係佢吸引嘅觀眾群，係遠遠比大婆台嗰啲值錢，特別係有後生仔。聽聞大婆台啲廣告sales，家陣會同啲客講佢哋嘅皇牌節目係周末嗰個耆英歌唱節目，嗰個我都覺好睇，不過唔係後生仔睇。
而ViuTV同電盈其他主攻印度同非洲嘅網上電視得的話，就會開始吸引大陸啲暴發例如「雙馬」想入股。到時就會學千禧年咁，又有概念。你可能話：「李澤楷係佢哋啲人啦，仲使入股？」咁就要反問你兩條問題。一，李嘉誠都撤走大陸了，使買你怕？二，郭鶴年都係被視為係佢哋人喇，咪一樣有人好似《南早》仲有人睇咁出價問佢買？電盈短炒繼續上！
孫柏文
獨立股評人
http://facebook.com/shuen
本欄逢周二刊出
孫柏文
金手指 - 孫柏文 舊文
來源 source: http://hk.apple.nextmedia.com
