金融High Tea 2016年4月28日
唱空股最怕有鬼
2016年04月28日
港股呢排似跌非跌，個市唔跌得主要係兩個因素，一係炒深港通快將啟動；二係炒年中摩根士丹利指數檢討，會將A股納入。家內地媒體同外資大行，不約而同開始炒熱呢個話題。不過，經過去年人民幣成功入籃後，引發人仔匯價震盪，市場都對呢類疑似好消息半信半疑，唔敢炒到咁盡。
去年中，A股入摩之說曾高唱入雲，最後願望成空，但大摩都做番少少創傷治療，畀番個希望內地，話今年6月再睇，所以家去到檢討前夕，市場開始炒作呢個話題。瑞銀證券中國首席策略分析師高挺就認為，隨着內地明確合格境外機構投資者(QFII)管理辦法，以及資金流動限制的憂慮解除，今年A股被納入明晟指數(MSCI)的機會比去年高，相信入摩機會超過五成以上。
但佢又提醒，就算納入MSCI納入A股，短期內對A股市場實際影響輕微，因為初步只會納入5%，料追蹤指數的基金進入A股市場，只會帶來22億美元的資金。
高挺嘅睇法，其實同市場大部份分析接近。對阿爺嚟講，MSCI指數同人仔入籃有啲唔同，大摩決策更多實利考慮，因為有部份被動基金係會參考指數投資。對大摩嚟講，若然繼續唔畀面阿爺，拒納A股入門，咁對做生意或者有影響；但如果擺咗入去，都要考慮基金反應。喺咁狀況下，同阿爺講吓數，叫阿爺做好啲，初期以較輕權重加入，都係順得哥情不失嫂意的做法。
對於入摩嘅好處，陸羽仁覺得家消息仲未大力炒作，現階段只係部份反映可能入摩的利好作用，但如果個市再借呢個消息炒上，咁就開始要小心好消息會反高潮嘞。
天能股價被砌低
呢排港股受特殊因素似跌未跌，昨日都係開市滑落，跌幅擴至130點，但收市跌幅又收窄番，恒指收報21361點，跌45點；國企指數收報9037點，漲21點，成交奀只有549億元。搶眼股份有渣打(2888) 借住首季業績出乎市場預期強勁，股價重上60元大關，收造62.7元，揚5.6%；匯控(005) 都跟漲0.8%，造52.65元。
因為被內地媒體質疑銷售收入和利潤數字的電池生產商天能動力(819) 發明聲明反駁指責，股價上演打鞦韆。
《證券市場周刊》聲稱早前走訪7位天能的銷售經理，均指佔天能83%的電池傳統主業，正面對產能過剩、價格戰有增無減等問題，令天能利潤持續向下。天能去年賺6.1億元人民幣，2014年全年虧損2.9億元。至於天能稱新業務中國電動車市場是業績增長點，報道就認為實施利潤貢獻有限，根本不足以令天能一年內扭虧為盈。
該報道推斷，天能今年和未來數年每年的真實盈利不會超過2億元人民幣。若給予10倍的估值，天能對應的企業價值不多於20億元，和停牌前近90億元的市值，完全不符。報道見報後天能早段遭大舉洗倉，股份周二停牌前收報6.31元，市值蒸發14.8億元。
對於內媒質疑，天能昨日發表聲明，引述益普索報告指電動兩輪車的市場保有量於2015年達到1.3億台，估計至2020年攀至1.4億台，對電池替換需求的年複合增長率為4%。同時，公司受益於中國電動車市場的快速增長，2015年天能實現銷售額約178億元人民幣，各主要業務板塊的銷售額均錄得大幅增長。與2014年銷售額相比，鋰電池增長209%，微型電動汽車動力電池增長83%，電動三輪車動力電池增長32%，電動自行車動力電池增長16%，資源再生業務增長29%。公司仲話對意圖唱空公司，及對投資者造成經濟損失的違法行為，已向相關部門報案。
鞋股有火車頭
由於天能回應主要係引述原有數字，暫時唔見有太多新料，股份復牌後雖然彈上6.6元水平，但好快插番落嚟，收報5.87元，再跌7%，市值跌到67億元。內媒通常做呢類唱衰報道，事前會先搞啲調研功夫，通常呢種狀況係無鬼唔死得人，怕有和公司關係唔好的內鬼爆料出街。好似天能呢類新能源股俾人咁唱一唱，股價相信都會幾傷。
今年全世界增長麻麻，體育用品藉住加入智能同優閒消費元素，成為表現較好嘅板塊。Adidas今年第二次調高全年盈利預測。撇除匯率影響，預期今年純利增長由原定的10%至12%，增至15%至18%。集團早前公佈首季業績快報勝預期，錄得收入48億歐羅。由於有幾個火車頭帶動，波鞋同運動衣飾股係今年二、三線股中較為好炒類別。
陸羽仁
金融High Tea 舊文
來源 source: http://hdfin.stheadline.com
