生活 - 葉朗程 2016年6月1日
老襯
同事提起訂造新恤衫，才醒起上星期日碰到一位小夥子。
覺得佢著衫幾得意，想寫嚇佢，後來冇咗回事。
趁現在得閒，急急兩句。
話說。
假期，回公司拿點東西。
等待升降機的時候，一位小夥子站在我旁邊。他是另一部門的同事，應該剛畢業沒多久，平日早咗返工都會見到佢。
他跟我點頭打招呼，我微笑回敬。
三個身位之隔，仍然嗅出他的香水味。稍為噴得重手，但味道還算清新。
進入升降機後，我無意中做了一件不道德的事。唔係逗佢啷啷，而係睇到佢用緊一個交友 app 跟另一位女生通訊。
隱約看到女生的名字是 Alicia 還是 Alice，也看到他打了 very good sushis 和 tonight 這些字眼。承認，我呢個人真係八到冇得再八。從他們的對話和他身上的香水味，好明顯佳人有約。
喺嗰刻，我好想好想好想同佢講：「不如你返屋企換過套衫先再同人食 sushi 啦。」唔係想寸任何人，係真心想幫人，奈何一個正常人畀我兜口兜面叫佢返屋企換衫，都應該會覺得我是有惡意的。
雖然最後忍住冇同佢講到，但希望佢睇到我呢篇文，好讓下次不會再犯相同的錯誤。
小夥子犯嘅錯誤，係我每次見我老豆，都會見佢犯嘅錯誤，which is，西裝褸襯牛仔褲。「嚇？你識唔識嘢㗎？西裝褸襯牛仔褲，黃曉明都咁著喎，有咩問題？」咁絕對唔只黃曉明啦，蔡楓華都試過咁著，但黃曉明著得冇問題，而蔡楓華就著得勁有問題。
到底，小夥子、蔡楓華、我老豆，佢哋三個嘅穿衣之道有咩共通點？答案係件西裝褸。
簡單嚟講，佢哋件西裝褸，就真係一件西裝褸。唔明？即係咁，你入到 G2000，話要買套西裝，咁講到明係一套，就梗係有褸有褲啦。
從步出 G2000 開始，你買的這套西裝，就必須「一起」見人。什麼意思？即係，要麼不穿，要穿就要整套穿。
純粹抽起那件褸，任意配合另一條褲，那怕它是牛仔褲還是卡其褲，這便是小夥子、蔡楓華、我老豆的著法。
But I must defend for my father，因為事實上，我老豆冇小夥子同蔡楓華咁離譜。我老豆係，西裝褸啦、返工恤衫啦、牛仔褲啦、皮帶啦、皮鞋啦，咁樣。重點係咩？重點係件恤衫，即係老人家扮潮還扮潮，都識著返件恤衫喺裏面。小夥子同蔡楓華係，著住套返工西裝褸配牛仔褲襯件 t-shirrrrrrrt 喺裏面，and that is what you call disastrous。
講完反面教材，就講嚇黃曉明。佢著牛仔褲襯嘅西裝褸，就唔係由一套完整西裝抽出嚟嘅西裝褸，而係一件獨立買返嚟嘅 sports coat，我自己叫佢做 casual 西裝褸。唔識點形容 sports coat 同返工西裝褸有咩分別，總之 sports coat 就算係靚 cut 靚料都唔會話太過貼貼服服咁。唔好畀個 sports 字誤導你，sports coat 絕對同運動褸無關。
只要你有件 sports coat 旁身，襯 shirt 又得，襯 t-shirt 亦可。
最後一提，著黑色 sports coat，千祈唔好襯黑色褲，兩者拼在一起，淨係想像嚇都已經覺得勁奇怪。
之不過，如果你堅持返工西裝褸都可以襯 t-shirt 喺裏面，我都唔會太反對，因為起碼代表你懷舊：七八十年代，我國改革開放的時候，這個襯法就是當時同胞的至愛。
原刊於plastic public
來源 source: http://thestandnews.com
生活 - 葉朗程 舊文
