智取大市：央行們今次高章
■正因這次股災有時間性，各大央行早有預備。 資料圖片
英國脫歐，總要面對。小弟打呢篇稿，銷漽三份draft後，最終決定講嚇今次股災嘅特性。
特性一，少有一場有曬時間表嘅股災。脫歐、留歐，投票至宣佈結果，有曬既定時序，近代股災中少見，即使2011年美國財政懸崖
，但大龍鳳後又最後武士，今次就冇咁好彩。
不過，正因有時間性，各大央行早有預備，連G7都預早打定聲明，一出事即㩒掣。不得不讚，央行們處理手法，冷靜得嚟幾高章，明知脫歐令市場意外，第一時間滙市肯定七國咁亂，但央行冇喺冇把握下狗衝救火，寧願由佢燒一日，任由英鎊急跌，等情況可控下，先慢慢出嚟維持秩序，令市場覺得央行成竹在胸，適時先出做嘢，成效亦更大。股災有時間性，睇嚟更容易阻止流動性緊縮發生。
特性二，少有透明度極高嘅股災。脫歐、留歐劇本顯而易見，唔使兩日大家已將脫歐後果、後遺症放射性討論，透明度高嘅可幸之處，係投資者唔再入去一間黑媽媽嘅鬼屋，而係一間光猛嘅鬼屋，你一入去係好驚，但係有幾驚，幾乎一眼睇得曬。呢種驚，最終會冇咁驚，跌市亦希望較短暫。
晉佳
http://www.fb.com/advanceguy1
本欄逢周一、三、五刊出
晉佳
智取大市 - 晉佳 舊文
來源 source: http://hk.apple.nextmedia.com
