智取大市：爆旋陀螺操盤法
■上周英鎊出現大陰燭跌穿橫行區情況，是極具神經質的市場表現。 資料圖片
上星期四同一位同事講開英鎊，行埋去Bloomberg機度睇圖，然後懶醒同佢講，「我從未試過見過一隻貨幣，大陽燭升穿橫行區頂部之後，第二日更大陰燭跌穿橫行區底部，你當春江鴨儍嘅咩！」
結果
，我用例子答你，上星期五英鎊真係出現大陰燭跌穿橫行區，強如貨幣市場之中嘅春江鴨，理應宇宙最強，都可以錯，唔怪得索羅斯都買英鎊損手。
春江鴨都錯有乜後果？結果令全球大戶驚惶失措，恒指先搶升、後急跌、再收復一半失地，令上星期五驚見巨型陰燭陀螺，本來陀螺係待變訊號，係反映市場觀望後市嘅形態，但大粒到呢個程度，我哋可稱之為「爆旋陀螺」，絕對唔可以睇成觀望訊號，而係極神經質嘅市場表現。簡單講，當日連大戶都唔知自己做緊乜。
上兩期分析過英國脫歐股災嘅短癮特性，同埋將會令到大市短線走勢更反覆難測，「爆旋陀螺」走勢正正反映呢件事情。要再苦口婆心咁講，未來至少三兩個星期，只能喺恐慌時睇升，亦可能一興奮就要睇跌，有機會出現近十年最神經質嘅一段時期。一係唔玩，一係老土地揸好股，為保命就用整體持倉某一水平作為全倉止蝕價，炒出炒入？恐怕就快同大市一樣變咗神經質。
晉佳
http://www.fb.com/advanceguy1
本欄逢周一、三、五刊出
晉佳
智取大市 - 晉佳 舊文
來源 source: http://hk.apple.nextmedia.com
