金融High Tea 2016年6月29日
飛石危機
2016年06月29日
和英國脫歐相比，其他市場事件都顯得渺小。巨震過後，有些重大交易還是值得留意。過去一個星期，最大內房商萬科(2202) 爭奪戰，出現急劇發展，集團的傳奇掌舵人王石很有可能被踢出局，不少市場意見均認為，王石是萬科的重要無形資產，若然他被飛走，就要對萬科前景提高警覺。
萬科在內地企業是塊奇石，因為它自股份制改革後，不再是國企，也沒有持絕對控制性股權的大股東，是少有由管理人運作的公司，而華潤過去只是一個佔股兩成的相對大股東，其他股權較分散，而由王石領導的團隊佔有的股份微不足道。這塊擺在大街上的肥肉，早前終於吸引深圳民企寶能垂涎，不斷增持以搶奪第一大股東地位。
萬科改朝換代恐不穩
備受挑戰下，萬科管理層全力迎抗，在原先主要大股東華潤沒有明顯表態下，王石等準備引入深圳地鐵作為支持者，以兩大地塊入股萬科，換取大批股份。出人意表時，華潤突然表態反對這個建議，寶能還乘勢要求罷免王石及整個萬科董事會、監事會，這個時候，王石等管理層才恍然大悟，華潤原先的袖手旁觀，很可能就是默許寶能的進襲。市場人士估計，王石等人的管理方式，可能華潤一早已有意見，無奈是公司過去發展迅速，業績表現出色，故此華潤保持緘默，現在有人出手，華潤就對管理層聯手施以致命一擊。
由於華潤傾向站在寶能一方，王石出局似乎逼近眉睫，市場上就響起同情王石的聲音。在炒股平台格隆匯有人就貼文，認為寶能質疑王石過去放下公司業務去遊歷以至泡妞、酬金過高等罪名，都與公司發展的正題掛不上鈎。市場這些意見不排除是王石支持者的造勢運動，不過，評級機構穆迪稱，如果罷免萬科現有董事及監事會的提議落實，萬科現有Baa1穩定的信用評級以及展望會面臨調整壓力。
睇番股價，去年七月寶能發動入侵行動後，萬科股價一度衝上24.2元，但隨着戰局漸分勝負，萬科股價反覆下跌，昨日回落到15.76元。過去一個月基本走勢是向下走之勢，陸羽仁覺得萬科股價回落有長短期兩大因素。短期而言，無論係萬科引入深鐵、抑或係華潤寶能聯手，都代表咗雙方唔會再喺市場搶購股份，原來推動股價爆升的併購因素消失，股價自然回歸平淡。長線啲睇，家股價差唔多回番去寶能郁手前水平，作為股東就要留意，飛走王石之後嘅萬科，股價仲可唔可以維持過去水平，因為如果佢做唔番以前水準，咁股價唔止無得炒，仲可能衰過做女嘅時候。
萬科能夠喺成千上萬內房企業中，擊敗無數民企國企成為最大地產公司，銷售稱雄，又以品質好聞名，係本業嘅專長，絕非等閒，這也是王石團隊恃才傲物，可能招敗的原因。寶能入主係看中公司龐大資產和價值，寶能本身強項係企業融資及財技，若然成功入市，能否營運一間如此龐大的內房公司，實在令人懷疑。或者有人會認為華潤屬下的華潤置地(1109) 都是好成功的內房公司，外傳華潤可能會派員接手，但即使如此，公司都會面臨好大嘅震盪期，未必再係長揸之選。妙就妙在最近唔止萬科跌，連唔關事的華潤置地都跌，昨收17.12元，跌近52周低位16.5元，可謂殃及池魚。
瑞信做港股淡友
港股經過脫歐一輪震盪後，市況繼續回穩，恒指收市報20172點，下跌54點，國企指數收報8536點，下滑31點，成交658億元。不過，有大行就睇得幾淡，瑞信副總裁兼亞太區投資策略師邵志銘表示，在亞洲市場中，最看淡港股走勢。香港市場對外圍市況最為敏感，波動較大，故將恒指未來三個月目標定為18500點；12個月目標為19300點，聽聞都唔止一間大行有類似睇法。
邵志銘認為，除了外圍影響，本土經濟表現不濟也是看淡港股的原因，一般投資者也可以在生活上找到端倪，例如餐廳顧客人數銳減，減省日常開支等等。港股佢只看好科網股板塊，因相關股份盈利能力高，資產負債表是眾多板塊中最健康的。他又預計，美國聯儲局會在12月加息一次，因美國本土的經濟數據不錯，但有通脹壓力。
陸羽仁
金融High Tea 舊文
來源 source: http://hdfin.stheadline.com
