智取大市：低調軟件股吸睛
■中軟去年純利按年升四成。圖為主席陳宇紅。 資料圖片
港股上升股近1,000隻，主板成交671億元唔算活躍，但總算增加，部份質素普通二、三線都開始起飛，反映大市升勢白熱化，雖未肯定升浪去到中後段，但呢一段雞犬皆升仍值好好把握，策略上，升勢從強勢股蔓延至次一級嘅
股，選擇自然多，只要港股市況隨美股持續升溫，就不乏短線機會。
科網股中，平時冇咁起眼嘅商業軟件股開始追落後，中軟國際（354）噚日成功突破頸線3.1元，升勢才剛開始；擎天軟件（1297）表現唔錯，連日大漲小回。小弟比較關注係中軟國際，始終泊住華為嘅碼頭夠吸睛。主營商業軟件嘅中軟國際去年成功引入華為作股東，後者持股3.97%，雙方本來早已有唔少合作，但持股令關係更趨密切。
未來中軟主要喺雲端同埋海外業務同華為合作，觀乎華為實力已遠遠拋離同業中興通訊（763），手機喺歐美地區銷情相當理想，品牌效應提升，亦有利華為進一步拓展海外，中軟做跟班自然有著數。事實上，中軟去年純利按年升四成，市盈率19倍，未計華為概念，單計估值都不嫌貴，資金吼緊次線科網股，呢一轉睇嚟預埋中軟一份。
晉佳
http://www.fb.com/advanceguy1
本欄逢周一、三、五刊出
晉佳
智取大市 - 晉佳 舊文
來源 source: http://hk.apple.nextmedia.com
