財經評論：
內房實力早分勝負
■有些內地傳媒計數，單是5月份已有69宗「地王」出現。 資料圖片
之前一篇評論提過，好多民營內房將會越來越難捱，近期大陸一些「地王」事件就印證了這事實。何解？近期深圳龍華上塘一塊商住地，被央企中國電建集團和廣州方榮房地產以82.9億元（人民幣·下同）以高價投得，地面
價每平方米5.68萬元。在前一日，中國信達（1359）旗下信達地產在上海寶山搶了一塊商住地王，作價58億元，溢價303%。
有些貼心的內地傳媒朋友幫手計數，單是5月已有69宗「地王」，入標的多是央企或同央企聯手，有錢任性，當然這些錢都是阿媽的錢，左手打右手，套用某明星說「不用分那麼細，我們都是中國人」。當然都有分析員朋友講，並非每塊地如此，歸咎傳媒喜歡炒作「地王」。但每次央企都大大聲話，「地價、成本好高，唔會盲目搶地」，這些現象又點解釋？
內房越漸難玩是不少民企的共識，無力搶，搶到無肉食先慘豬，所以明明無能力都話要轉型，想被「滲」股或埋堆險資，令資金充裕，借錢成本減輕。無奈中國一向「識人好過識字」，要埋堆當然要搵大牌頭，鬼理你民營小房企，而且中國成日都話要汰弱留強。一句「out」，唔入流小民企就紅牌離場。
再講，有些說話難聽過粗口……好似之前深圳某大大隻的民企內房股，企業形象一流，任何事都企在道德高地，點知一場難睇的股權爭拗，俾人場外掃貨無力反擊，創辦人除口水戰外，竟講明不歡迎民企做大股東，更轉身搵了另一國企入股，但又激嬲本身是老股東的國企。
信不信大陸市場化？做人總要信的。但當球員、球證、裁判都是我的人，你怎麼跟我鬥呀！
記者：方楚茵
財經評論 舊文
來源 source: http://hk.apple.nextmedia.com
