智取大市：未到終點唔收割
■科通芯城剛公佈搞機械人解決方案業務，單日升4%。圖為主席康敬偉。 資料圖片
啱啱恒指上試一條分唔出牛熊嘅所謂「牛熊線」，然後升幅收窄，就聽到唔少聲音話「有阻力！」由此可見，市場氣氛異常地冷靜，好審慎，遠未去到亢奮，係好事。
喺全球鬥放水預期、美股破頂之下，
港股冇理由唔挑戰嚇傳統技術超買水平，即係9日RSI80，同時市場氣氛唔high唔開嚇party，作為好友點收貨？目前恒指9日RSI65左右，要閒閒哋升去80，大概連續兩日每日升三百幾點，換言之，中短線目標價22000點其實唔難。過程都係得個估字，知道去得到終點就OK啦。
到終點之前，如果有貨在手，每日可以審視嚇個倉，將升到咁上下而走勢開始轉弱嘅股沽出，換馬去剛轉強股份，keep住個倉夠攻力、夠強勢，上述策略對大部份股管用，除咗騰訊（700）之外，因為騰訊一沽咗隨時買唔返，用嚟做膽實冇錯。
啱啱轉強嘅股，就翻兜科通芯城（400），佢剛公佈搞機械人解決方案業務，單日升4%。次次升市都有科網股份兒，基本因素冇逆轉之下，睇唔出今次有乜理由唔炒。畢竟科通早排打算以每股12.5元配股，足證野心夠大，市況好，點會唔把握機會炒上去。
晉佳
http://fb.com/advanceguy1
晉佳
智取大市 - 晉佳 舊文
來源 source: http://hk.apple.nextmedia.com
