魚樂無窮 - 唐牛 2016年7月19日
魚樂無窮：半新股中的極品
■萬景上市剛滿一年變身潛在殼股，難怪近期股權紀錄有大變動。圖為集團執行董事盧源昌（左）及盧奕昌。 資料圖片
開講有話，空穴來風未必無因。在股票市場，尋常事物突然出現異動，背後總有原因，甚至是全盤計劃，只要心水夠清，捉中幕後人士心理，順風車可以帶你走得更快更遠。
萬景控股（2193）CCASS於兩個月前出現異動，原先大股東以個人名義持有嘅股權，突然全數放入工商銀行，涉及股權達72.29%，以現價計，大拿拿講緊3億幾錢嘢，如此勞師動眾，你估真係貪過癮？睇一睇公司背景，萬景原來於去年7月上市，今個月剛剛滿一年，意味大股東股權可易手，正式變身潛在殼股，將兩件事連埋一齊睇，明啦？
客觀事實會令你更有信心︰萬景主要在港從事土本工程業務，說穿了又係一隻建築殼。有幾吃香？你見盈信（015）拆完一隻又一隻就知啦！
公司剛宣佈全年業績，全年盈利2,720萬銀，兼坐擁1.7億銀淨現金，最新市值只得5億銀，連殼價基本plan都未到，一句到尾︰半新股中的極品！近期股價處於歷史高位，樓上零蟹貨，有心人要舞上話都冇咁易，唔敢講一定會開車，但如此牌面，值得真金白銀投一票囉。
唐牛
http://fb.com/tongcow88
本欄逢周二、四刊出
唐牛
魚樂無窮 - 唐牛 舊文
來源 source: http://hk.apple.nextmedia.com
