金手指：
《Pokémon GO》點複製
■《Pokémon GO》推出約10日，就令任天堂市值多咗約1,400億元。 資料圖片
呢個唔知係咪一個產品推出後，令一間公司市值上升嘅紀錄。大約10日前推出《Pokémon GO》遊戲後，任天堂嘅股價升一倍，市值多咗大約1,400億港幣。藍
籌領展（823）嘅市值都係1,200億元咋。
10日變領展般市值，係點做？歷年同《GO》版嘅Pokémon，本身係個好簡單嘅遊戲。你係個訓練員，原本有一隻精靈，跟住透過喺地圖（以前喺電腦裏面，《GO》版就喺現實世界）搵到其他精靈，打佢至重傷後，捉佢番去訓練。之後可以同啲「大佬」級訓練員對戰，贏咗就送印花，最後打贏曬啲「大佬」集齊印花算爆機。
啲精靈捉番嚟，可增值變成其他精靈，精靈款式有幾千種，所以喺《GO》版見到啲特勁精靈出現時，啲想儲齊精靈嘅人就喪屎咁追。片段對任天堂股價嘅震懾力，有如當年戴卓爾在北京PK對港幣嘅影響。
當你係傳媒老闆，想複製《Pokémon GO》，得唔得？因現有前科引路，我覺得比想像中易。首先，要係角色扮演遊戲（做精靈訓練員）、好多人已知點玩，即現有遊戲（歷代Pokémon已售出兩億套），同埋個遊戲以前base喺地圖上（Pokémon第一集用日本關東地圖）。
即係出「古惑仔GO」。做個行古惑嘅，中學收𡃁訓練，酒吧販毒、街頭互劈搶地盤。以前冇咁嘅遊戲，想鬧我自相矛盾？有，不過英文叫《Grand Theft Auto》。唔通下隻爆升就係出GTA嘅Take Two？
孫柏文
獨立股評人
http://fb.com/shuen
本欄逢周二刊出
孫柏文
金手指 - 孫柏文 舊文
來源 source: http://hk.apple.nextmedia.com
