Can Bank：
加州健身的真苦主
■California Fitness事件鬧得滿城風雨。 資料圖片
近期California Fitness事件鬧得滿城風雨，前股東王炳權上周開記者會出嚟解釋，筆者聽完都真係一頭霧水，首先王先生自稱自已唔識管理公司，所以將呢間接近破產嘅嘢
賣畀哥哥王倫，已經夠古怪，更奇怪嘅係王先生係用咩身份去講新買家嘅問題？
王先生又多次講，「我都係苦主」，首先佢呢個「苦主」同我哋一直有共識的苦主（客戶）本質上已經有分別。佢呢個苦主，買之前自已唔做盡職審查，信咗鄭家達話做咗（根據佢所講），之後發現有問題，但仍然sell客，製造更多苦主嘅「苦主」；而客戶就係畀可能都係乜都唔知嘅職員sell完之後，成為一個真正係無辦法知道發生乜事嘅真苦主。
到最後前股東王先生開嘅記者會，不單無講到客戶最關心的會唔會有新買家接手問題，只係不停向公眾吐苦水嘅記者會，相信不只客戶甚至係職員聽完都一肚氣。事件發展到今時今日，即使真係可以搵到買家，相信客戶都會有戒心，新買家接手重建客戶信心都有難度，這樣舊客對新買家而言，價值必然會大減。
其實要健身一啲都唔難，視乎個人目標，如果閣下目標只係做嚇運動嘅，其實康文署旗下有73個健身室，使用率雖然近年不斷有增加，但整體仍然是五至六成，當然個別會達到八至九成，但收費相對便宜，由於無全職教練，亦都唔存在教練因為增傭金收入而sell客問題。不過，使用之前需要上半日堂，確保各位識用相關器械，以免發生危險。當然亦都唔會有美女教練同你拉筋。但如果閣下真係想學拉筋嘅，上YouTube相信會獲益良多。
散子
本欄逢周二刊出
散子
Can Bank - 散子 舊文
來源 source: http://hk.apple.nextmedia.com
