金手指：捉小精靈唔食數據
■《Pokémon GO》最大突破係開放喺手機平台。 資料圖片
如果做電子遊戲嘅任天堂係間電影公司，Pokémon應該都算係電子遊戲界中嘅《復仇者聯盟》。因數十年計，年年都推新版，仲要每個版本都咁收得。
咁任天堂以前出Pokémon，就一定迫玩家買佢部Gam
e Boy機先玩得。而喺兩周前出嘅《Pokémon GO》，最大突破唔係咩AR；而係佢開放喺已有數億部嘅手機平台。就係因為咁，加埋呢廿年近乎全球今日由十至三十歲人都識玩呢個地圖遊走去捉、訓練怪獸去打大佬嘅熟客群，就成全球熱潮，任天堂股價喺十個交易日升倍幾。
點知，任天堂噚日話新遊戲雖玩家好多，不過未見對收入及盈利有影響。一講，股價大跌，由高位跌三成。我冇咁悲觀，不過已上升市值大約100億美元，乘10倍PE計，呢隻遊戲要每年賺十億美元先值。以前每個新版Pokémon其中可以更新吸引玩家再玩，就係新地圖。當你用現實世界，地圖冇得更新。所以你現價買任天堂，攞膽。
噚日，雖任天堂股價跌17%，不過因《Pokémon GO》登陸香港，港電訊股都上升。問題係，你覺遊戲會令更多用流動數據所以買，就牙煙。根據9GAG啲專家意見，《Pokémon GO》其實設計上用好少數據，最食數據都係流動地圖。不過當用戶發覺佢哋可先用wifi預先下載幾百平方公里嘅Google Map地圖時，電訊商連呢條水都未必舔到。買電訊股，就係賭啲用戶有幾白癡同懶惰，冇值博率。
孫柏文
獨立股評人
http://www.fb.com/shuen
本欄逢周二刊出
孫柏文
金手指 - 孫柏文 舊文
來源 source: http://hk.apple.nextmedia.com
