金融High Tea 2016年7月26日
炒得精靈轉身要快
2016年07月26日
天氣熱辣辣，真係郁一郁都出汗。除了夏日來臨，仲有一股熱浪突然到訪香港，就係美國熱爆的虛擬實景遊戲Pokémon GO周一早上11點20分突然在香港上架，全城即時響機提醒公眾下載捉精靈，我都趁吓熱鬧，捉咗幾隻精靈，試驗一吓呢個熱爆全球遊戲，到底有幾吸引。
Pokémon GO成為科網神話，引起無限憧憬，精靈終於來到本港，搞到電訊股都炒作一番，幾隻股份香港電訊(6823) 收市升咗1.1%，造12.38元，和電香港(215) 飆3.5%，造2.98元；數碼通(315) 漲3.3%，報14.28元。有中環茶友心思思問，係咪可以湊吓熱鬧呢？茶友兩、三年前炒過一轉本地電訊，當時正值蘋果手機熱潮，佢兩個幾入和記香港，之後趁高減持，最後嗰手貨差唔多賺咗五成，家自然想食過番尋味。
Pokémon GO送電訊股一程
睇番本地電訊股，上半年走勢先係呆呆哋，但近幾個月表現好轉，動力之一應該係佢哋派息比較穩定，普遍有4、5厘息率，喺大家追尋派息穩定嘅投資下，被視為公用股的香港電訊屢創掛牌後新高，帶動成個板塊向好，呢個就係本地電訊股嘅基本質素。至於Pokémon GO只係錦上添花，送多佢哋半程。
本地電訊股有息派，家有埋少少概念，咁係咪好值得追捧呢？咁就要視乎你係長揸定短炒，短炒嘅話追捧股民突然多咗，呢樣同基本因素無關。如果長揸，咁本地電訊市場同好多香港行業一樣，面臨市場飽和，要搶客爭生意的狀況。呢兩個月和電香港(215) 旗下的3香港就專攻商業客，特選客戶的4G無限上網計劃的月費僅136元(連行政及隧道費)，公平使用量3GB，超過用量才限速。喺咁狀況下，新遊戲雖然可以刺激用量，但可能只係減少咗搶客衝擊，對增長唔覺得有好大刺激。同當年iPhone打入市場，令好多客轉上4G plan，不可同日而語。
任天堂以Pokémon GO首度進軍手遊市場，令股價暴升，但上周五突自爆，表示對集團盈利影響有限，觸發投資者重新計數，發覺呢個遊戲成功，可能最大贏家係蘋果，而唔係任天堂。
Pokémon GO由Niantic負責研發、提供下載，該手機遊戲各三成收益分別予蘋果公司、Niantic及任天堂持股32%Pokémon公司持有，只得10%收益會直接落入任天堂名下，任天堂管理層上周向投資者解釋，呢個遊戲對業績影響有限，並稱不打算調整業績預測，消息即嚇散投資者，最終令任天堂股價今日在日本跳崖狂瀉兼跌停板，收造23220日圓，大跌近18%。任天堂大跌還拖冧Pokémon GO贊助商日本麥當勞，其股價全日大跌12%，真係搞到熱捧相關概念股嘅投資者如冷水淋頭。香港嘅電訊股情況同任天堂唔同，佢哋息口同收入好得多，陸羽仁只係提醒，好夢由來最易醒，搭順風車跟炒最緊要時時做定跳車準備。
港股昨日先升後跌，但尾市「U盤」重臨，結果大市喺呢個時段止跌回升。恒指收報21993點，升29點；國企指數收報9034點，升2點，成交金額493億元。
中國城建引資變池魚
中國城建集團(711) 開市後股價急跌，呢間公司以前叫俊和集團，係本地大型承建商，近年兼做地產。生意本來唔錯，不過，集團年內引入中城建集團成為第二大股東，由於中城建系的中國城市建設(國際)點心債已發生違約，拖累中國城建急挫至0.91元，插咗8%。
港資俊和呢次引入中城建，其後中城建股權轉換，由惠農基金持股99%，市場人士就擔心中城建並非屬於國資委，因此不屬於央企，憂累旗下城建國際在港發行的3年期點心債或受影響，想唔到現在憂慮成真，搞到公司股價受累。家小股東梗係希望集團有清楚分隔開主要股東同公司的關係，以免城門失火，殃及池魚。俊和本來好好哋係港企，點知引入內資搞出大頭佛，早知如此不如索性賣盤好過啦！
陸羽仁
金融High Tea 舊文
來源 source: http://hdfin.stheadline.com
