異動空間：載通高息資產厚
■載通資產豐厚，屬進可攻、退可守之選。圖為主席梁乃鵬。 資料圖片
同幾位戰友傾開樓價問題，佢哋不約而同話：「啲股就跌到趴街，樓都係回咗幾個巴仙，頂多叫高位回氣，唔算係跌。」睇中原指數，最近又連升四星期，半年埋單計數，CCL只係回落4.7%；地區方面，最傷嘅新界
西都係落返6.7%，唔覺跌十分正常。
樓價頂得咁行，辣招唔撤二手買賣兩間，資金倨買一手樓，當然係因素之一，但魏力認為全球放水負利率，人仔加速貶值，唯獨美國可以噏嚇加息，聯繫滙率下，香港磚頭自然成資金避險對象。樓價要進一步回落，離不開經濟惡化及供應增加，近月減薪裁員潮剛起動，份工唔知保唔保得住，買樓意欲自然下降，但低息又有助減慢跌勢，樓價似乎都係磨爛蓆、陰乾向下格局，難怪發展商為貨如輪轉，要破天荒借120%按揭誘客上車。
港經濟轉壞，樓價唔啱心水可以等，但交通費就好難慳，持有九巴的載通（062）食正油價低企、乘客量增加呢條水，去年純利增長51.5%至6.29億元，派息率近六成，現價股息率仍逾5厘，加上持有多項物業及觀塘、屯門車廠地皮權益，資產豐厚，屬進可攻、退可守之選。
魏力
http://www.fb.com/2012jason
本欄逢周一、五刊出
魏力
異動空間 - 魏力 舊文
來源 source: http://hk.apple.nextmedia.com
