蟻步向上
2016/07/21 09:29:23
網誌分類: 經濟
亞洲股市開始無乜力水，表現麻麻，但歐洲股市造好，法國同德國股市齊彈1.2%；美股有外圍帶動，加上美企公布的業績普遍好過預期，繼續走強，杜指盤中高見18622點；標普500指數見過2176點，均刷新歷史新高，尾市略為回順。杜
指收市升36點，只升0.2%，報18595點，已經連升第七日；標普500指數升9點，收報2173點；納指昨日表現最好，升54點至5090點，升幅超過1%。
美元持續走強，反映美元兌6隻主要貨幣匯價的美元指數昨日早段一度升上97.32的今年2月底以來高位，午後略升回順，仍收於97上方。美元指數2月25日低位93.08反彈，約3個月時間，已經升了超過4%。美元強勢，對商品、原材料、出口及以國際業務為主的跨國企業都做成壓力，紐約油價昨日朝早就跌穿每桶44美元，雖然隨即反彈上45美元樓上，但午後始終企唔穩。能源股受壓，拖住美股後腿。金價再跌0.4%，去到1313美元水平。
美企公布的業績普遍都好過市場預期，正如早前提及，市場對美企的盈利預期都唔高，結果唔少好過預期，市場氣氛又受到提振，大市又做番好一些。昨日推動大市向上的主力係科技板塊，特別係生化股，令到納指能夠領漲大市。其中微軟業績不俗，股價昨日就大漲5.3%，係表現最好的杜指成份股！
美股近期屢創新高，有分析列出當中幾個主要原因，值得提提。第一係基本因素正在轉好。市場普遍認為美國企業盈利似乎已於第一季見底，第二季開始反彈回升，而今年下半年美企將會有盈利增長。另外，有唔少指標都顯示美國經濟整體有改善跡象，例如花旗集團的美國經濟指標已經升上一年半高位；而亞特蘭聯儲銀行對第2季美國經濟增長為2.4%。不過，要小心的是，美股最近的升市是否已經全面反映經濟好轉的因素。如果是的話，升勢便好難持續。
第二、從圖表睇，美股技術走勢向上。理據主要係美股經過一段橫行、2月時向下大插，之後反彈上歷史新高，已經做了一個繼續向上的形態。
第三、債券利息崩潰，美國10年期國債息率由2.3厘大插至1.4厘，已經令到標普500成份股的平均收益率高過政府債券。當中大部分的大藍籌收益率已經高過債券好多，吸引投資者重投股市。
第四、聯儲局已經變成股民的朋友。市場現時預計聯儲局7月加息的機會係零，而9月加息的機會只有兩成。聯儲局唔加息而美企盈利好轉，係一個有利股市的罕見情況。
最後，就係市場普遍而言，投資者仍然抱著熊市心熊，對後市無乜信心，這正正係大戶挾高大市的良機。
無據如何，美股過去的走勢是一級級上，創高後升得多會顯著回吐，見到而家美股是蟻步向上，亦知道唔少人開始畏高，擔心回吐會出現。
陸羽仁
回應(1) 我想回應
陸羽仁 BLOG 舊文
來源 source: http://blogcity.me
