翠華小股東望天打卦
2016年07月21日
港股唞咗一日又爆上，恒生指數周三低開27點後極速收復失地，午後高見21895點創今年新高，恒指收報21882點，升209點；國企指數收報9023點，上漲34點，成交繼續不成比例，只有585億元。匯控(005) 重返50元關，升1.5%造50
.25元，推動恒指30點升幅。
個市仲係強勢股繼續領漲，本地地產股攀升之餘，部份資金流向較落後嘅收租股好似九倉(004) 咁。
地產股靠炒「短觀」
呢排二手成交好咗，地產股又活躍，《巴隆氏》喺每日分析就提問，香港樓市係咪見咗底？佢話，由於預期息率向下，令到置業負擔改善，加上樓價回調12%，間銀行統計港人嘅負擔能力指數降低為38%，比一年前嘅43.7%好咗，文章仲講述做樓價指數統計嘅城市研究分析師，估計樓價喺三月見咗底，而喺購買力累積後，家交投逐漸增加番。文章話睇好新地(016) ，另外睇好市帳率只得0.5%的信和(083) 。
《巴隆氏》喺投資媒體裏面個名好大，要講嘅係喺網絡通訊嘅快速年代，連呢啲權威機構都只爭朝夕，睇佢文章嘅內涵，佢探討嘅所謂見底，只係日本仔所謂嘅「短觀」，即係暫時嘅睇法，係分析短期股市多過認真分析樓市。睇番地產股表現，新地、信和呢啲好股已經升咗好多，家資金開始買吓落後嘅股份，好似嘉里建設(683) 同九倉。嘉里主力做豪宅，佢昨日收報20.3元，升咗1.7%，每股資產淨值有56元，息率有4%，佢低位係16.6元，高位係29元，所以吸引資金炒吓落後。
周二有報道話，發改委就放開發用電計劃徵求意見，市場認為電力改革有實質性進展，內地電力股造好。華能(902) 升3%報4.6元；中國電力(2380) 售電數據佳，股價揚5%造3.03元，華潤電力(836) 升4.9%造12元，為升幅最大藍籌股。值得一提係新能源股龍源(916) 漲3.6%報6.28元，龍源舊年喺10元高位反覆下跌，穿埋5元，今年就開始轉運反彈，至今已累升唔少。
車市旺帶挈零件股
另一強勢板塊汽車股再集體炒上，當中北京汽車(1958) 表現最醒，收升9%造6.75元；長城汽車(2333) 都升近5%造7.38元，為升幅最勁的國企指數成份股，汽車零件股同受追捧，耐世特(1316) 急升9.6%造7.74元；敏實(425) 揚5%報26.5元，零件股市值細啲，炒起嚟隨時仲好味。
升市中，翠華(1314) 宣佈大股東可能賣盤，股價乘勢急飆15%，收報1.57元，但對高位接咗貨嘅股東，呢個升幅都補唔番幾多。
翠華上市後股價一度大炒，當人人炒得好高興時，陸羽仁就好唔識趣咁講真話，坦言唔睇好公司前景同股價。早前，翠華宣佈去年業績大倒退，之後突然停牌。翠華其後公佈主席李遠康等一眾人士獲獨立第三方接洽，擬出售逾60%股權，強調有關討論仍在進行當中，尚未訂立具法律約束力的協議。據港交所(388) 資料，李遠康等一眾翠華創辦人有近65%股權。以昨日收市價計，大股東可以套番超過14億元，但真正落袋有幾多，就要睇佢係咪買番盤生意同作價如何。
翠華截至今年3月底止全年純利大跌逾50%至7168萬元，每股仍派1.5仙末期息及1.6仙特別股息。不過，我估佢業績有機會仲未見底，未來盤生意可能仲衰啲，如果唔賣盤，公司可能仲要捱一段時間。睇番佢上市後股價見過5.5元，當時市值77億元，家就算跌咗，市值都仲有22億元，就算公司個殼可以賣番7、8億元，高位買咗嘅小股東都係望天打卦。
茶餐廳生意賺嘅係心機錢，市場競爭激烈，喺經濟低迷下，有人肯買殼，我係大股東點解唔輕輕鬆鬆收番幾億先。至於買咗貴股嘅小股東唔容易鬆綁，唯有望新股東可以有另一番搞作或炒作。由於佢市值高過殼價唔少，高追就有多少風險啦。
陸羽仁
金融High Tea 舊文
來源 source: http://hdfin.stheadline.com
