收市閒情：老婆落妝真面目
■買中名城化妝樓都仲可以執一執再賣，揀中個識化妝嘅老婆就一世㗎喇。 何家達攝
又係我，阿James，好耐冇見。喺度又要講一個故事，6年前屬於我嘅故事……
「你又話我哋搬去九龍塘？頭先我哋邊個地鐵站落車？」「呢度係近大圍火車站」，背住名城，望住嬲到想殺人嘅阿
怡，「但你睇番6年前長實宣傳二期個盛薈，佢都係寫『一脈相連九龍塘』，冇呃你。」對住發爛渣嘅阿怡，我好易講錯嘢……「大家都喺東鐵線，仲要只係差一個站，不用分得那麼細」。
當日阿怡俾我激到轉身走，但我都說服到佢第一步先買同九龍塘一脈相連嘅大圍名城，結果2010年，我用近800萬買名城三房單位。
點知買咗先發現層樓係「化妝樓」，客廳、兩間房冷氣天花滲水，又使多咗筆錢。事隔6年，阿怡有咗，本來係好開心嘅事，為咗BB出世後方便屋企人照顧，所以要賣樓搬屋，又係一個災難。我開價900萬鬆沽，又係咁俾啲茂利壓價，左一句「名城質地差，唔值」、右一句「名城都唔係真係咁近港鐵，唔值」，結果870幾萬先沽到。
「咁我哋都賺到一球吖……」「一球？計百分比都係得13%，我朋友又係差唔多時間買荃灣樂悠居，用咗200萬唔使，啱啱400幾萬沽，賺兩球呀！」佢繼續：「當年都叫你唔好買名城，仲要買中化妝樓？你睇嚇𠵱家？」聽到「化妝」呢兩個字，我，真係忍夠啦！「講夠未？當年你……」原本，我真係好想爆佢，但望一望佢大住嘅肚，我決定忍住啖氣……
「講夠未？當年你日日都化妝，我都係結咗婚先知你落咗妝真面目，你有咩資格講我買錯化妝樓？」
買錯化妝樓，係慘，但總算可以執過可以沽；不過娶個識化妝嘅老婆，做水魚之餘仲要踎一世監。今次，真係寶寶心裏有苦，但寶寶可以向誰人說？
千頌C
http://fb.com/winbigwok
本欄逢周三刊出
千頌C
收市閒情 - 千頌C 舊文
來源 source: http://hk.apple.nextmedia.com
