中環迷你裙：錢唔值錢點算好？
■未來兩周要迎接歐日美央行議息。 資料圖片
坎坷家庭兩大元素：慈母、敗兒。各國央媽希望子民生生性性，但通常係主觀願望嚟嘅，敗兒每日職責就是洗腳唔抹腳，玩大咗吖？有央媽埋單，間中有人衝出來發狠話，「你咪鬼救佢喇！」央媽即刻慈母上身，「唔救佢會
死架！佢死咗我都活不下去」。沒人想忍受痛苦，故央媽唯一做的是救得幾耐得幾耐，基本面是會衰敗落去，結局如何？沒有人敢再想下去。
央媽唔畀衰退就要硬放水，國債負息變常態，手上的錢更唔值錢，要保護購買力就要為資產加快增值，炒樓、炒股、炒債，直至音樂播完為止。未來兩周要迎接歐日美央行議息，恐防各央媽出奇不意，基金們衝完一浸後又企定定唔鬱，幸好昨日推介的盈喜股山東新華製藥（719）能夠逆市升近8%，衝穿埋250日線，如果唔係悶死Samantha了。
要揾「錢途」，可循著未來發生的事入手，巴西奧運下月5日正式揭幕，體育股近排表現僅限於跟大市同步，隨著奧運熱升珉，體育股炒起只是時間問題，在雲雲眾股中揾隻最啱口味的，首選中國動向（3818）。高息、淨現金、估值平、業務對辦。
資金愛房託，因其90%派息比率的承諾，高息股受到青睞與否，就睇嚇track record，中動向上市至今都慷慨派息，去年派息雖然稍遜，但仍有60%派息比率，坐擁6.5厘息，以主流體育股而言派息算豐厚。中動向去年11.4億（人民幣．下同）現金，扣除流動負債還是淨現金狀態，計及阿里在內的39億元金融資產，底子可謂相當豐厚。
中動向上年度剔除投資收益的業績對辦，經營盈利按年增1.7倍至2.6億元，中國區Kappa的毛利率上升6.5個百分點至67%，中國佔集團盈利按年增長56.2%至2.17億元，日本虧損亦收窄。市盈率僅9倍，性價比高其他同業一截，博10%至20%回報不過份，話曬炒到2元還有5厘息。
Samantha
http://fb.com/stocksamantha
本欄逢周三刊出
Samantha
中環迷你裙 - Samantha 舊文
來源 source: http://hk.apple.nextmedia.com
