財金冒險號：
有種關愛叫人顫抖
■港交所行政總裁李小加曾強調深港通「好事多磨」，但對香港究竟有幾好？ 資料圖片
是的，那是一個注定要用黑色筆填寫的日子——8月17日。
深港通終於宣佈了，但市場好唔畀面，所謂嘅受惠股全部插水，恒指都先升後跌。如果說9年前那個驚心動魄、恒指一度跌1,200
點，然後因為從來無通行過的「港股直通車」而反彈千點的8.17大奇蹟日，係港股進入牛三的開始，那麼今天，當久聞樓梯響、毫無驚喜的「深港通」終於公佈，投資者應該意識到走得快好世界，港股已進入大調整了。
李小加喺記者會講咗幾次「好事多磨」，深港通對大陸無疑係好事，但對香港呢？消息公佈當晚，新華社就發文，強調深港通點樣利好香港。小生一路睇篇文，一路諗起曹仁超嘅名言：「香港是好乾淨的水，內地是好汙穢的水，『通』完後，你認為香港的水會變得更乾淨還是更汙穢？」大陸人從此可以輕易炒賣本港小型股，爛股炒到市值過百億然後暴跌嘅悲劇，肯定越來越多，最終只會令人對細股避之則吉，成交及估值不升反跌。
新華社篇鴻文又話：深港通「再次體現了中央政府對香港繁榮發展的重視、關愛與支持」，更加打冷震。香港嘅支柱係金融業，而香港嘅剩餘價值、比上海深圳優勝嘅，係法治、廉潔，近3年警隊、廉署已被閹割，加埋銅鑼灣書店、梁天琦事件，如此「關愛」，令人感激流涕。
笑笑生
mailto:sneeringman@gmail.com
本欄逢周四刊出
笑笑生
財金冒險號 - 笑笑生 舊文
來源 source: http://hk.apple.nextmedia.com
