李小加偷睇答案
2016年08月12日
美股回軟，港股自炒，用深港通即將通車嚟借吓力，成功做出六連升。
港股昨日先跌後升，發力點係港交所行政總裁李小加明示，深港通有料到，喺佢出口術加埋市場傳聞下，大市一度升近兩百點，再創今年高位，後因內地股市下挫，升幅收窄至不足100點。恒生指數
收報22580點，升88點，國企指數收報9423點，升107點。
港交所宣佈業績，純利難逃倒退，行政總裁李小加即時出招，話深港通愈靜愈有機，O依家睇番佢係偷睇咗答案扮分析。市場人士笑言佢真高招，連無消息都畀佢講到變好消息。唔知係咪又咁啱，市場又傳中證監為加大深港通，近日於內部設「深港通」專項工作小組，港交所開市後一度回跌後好快就倒升，港股開市後仲傳出好快開通嘅講法。
總理李克強講咗深港通今年要開通，領導人開腔後，管理層無論點都應要達標，數數手指O依家已經係八月中，如果要趕及年底死線，兩地負責部門真係要加大力度先得。
牌面睇深港通開通只係時間問題，但刺激有幾大就好難講，去年若然唔係因為有A股牛市，單靠滬港通，拉動港股嘅力度好有限。
不過，股市係炒憧憬，O依家就算對措施作用有懷疑，但你唔講、我唔講，咁就炒住先。昨日就有兩大類股落鑊，深港兩地掛牌嘅股份同證券股都炒吓。券商股炒起，中信證券(6030) 為升幅最大的國企指數成份股，升逾4%造17.74元；海通證券(6837) 、華泰證券(6886) 升3.8%。二線券商股升幅更勁，英皇證券(717) 大升13%收0.79元；第一上海(227) 飆11%造1.4元；有老總跳出來放風嘅港交所(388) 升近3%，造197.7元，為升幅最大藍籌股。
深港通升溫下，於深圳上市的本地H股亦受捧。浙江世寶(1057) 勁升15%造10.9元；新華製藥(719) 、山東墨龍(568) 升6%元；東北電氣(042) 升5%造2.9元；中聯重科(1157) 升3%造2.68元。
深港通成為炒港交所嘅藉口，但另一單政策嘢對港交所就未必有利。個幾月前證監會對新股上市架構重組提出諮詢，根據建議會組成新架構，分享O依家港交所上市委員會嘅權力，建議公佈後即形成兩大陣營，一個由前監管人員為主力，撐建議可行，另一個則由市場同港交所董事李君豪為代表，立場基本上係反對改革。
上市權力放喺邊，係證監同港交所長年矛盾。對港交所不利嘅係全球O依家都興由交易所分拆上市功能，加上近年新股表現參差，好多公司上市後好也賣殼，令證監不滿之餘，同時令港交所失去反對的道德高地。
有熟悉監管事務嘅猛人話，為了扭轉形勢，港交所早前已宣佈七招，用以收緊上市要求，防止新公司賣殼。呢啲招數有無效未知，但顯然係唔想通過改革方案，寧願自己先做嘢。但睇嚟證監仲未收貨，繼續推動分權行動。
新股上市係港交所一個幾主要嘅收入來源，若然上市權力被分薄，理論上對佢股價不利。呢次業績港交所成績表麻麻，李小加即刻拋深港通出嚟頂住。九月中新股架構諮詢會截止，相信反對人士會全力還擊，屆時戰果可能會對港交所股價至少會有啲心理影響。
市場等李嘉誠出手
長和(001) 公佈截至6月底止中期業績，撇除出售投資所得盈利，上半年除息、稅前盈利(EBIT)為294.7億港元，按年跌4%。長和系主席李嘉誠於長和中期業績報告表示，英國脫歐已成定局，將於未來至少兩三年間，為英國及歐洲帶來不少負面挑戰。
長實地產(1113) 公佈截至6月底止中期業績，純利升24.9%，至86.1億元，每股盈利2.23元，中期息每股派0.38元。改組後長地走勢力拼長和，尤其脫歐後，長地借勢過頭，市場話李嘉誠一向擅於併購，長和幾時發威，就睇佢幾時有大動作出手嘞。
陸羽仁
金融High Tea 舊文
來源 source: http://hdfin.stheadline.com
