財經評論：
值得畀多80萬嗎？
■上周六屯門新盤豐連狂賣300幾夥。 資料圖片
經過上周六屯門新盤豐連狂賣300幾夥，細價樓反彈訊號進一步被確認。之後輪到馬鞍山同樣主打細戶的薈朗搶住開價，明顯想搶截上星期六抽唔到屯門盤一房同開放式單位的客源。不過，屯門豐連最平開放式單位、實用253呎折實197
萬元，即「兩球」有找；馬鞍山薈朗221呎開放式戶折實要276.8萬元，賬面計，兩個單位價值差成80萬元。
計發展商名氣，薈朗發展商為宏安（1243）；豐連發展商為南豐，坦白講，兩間都唔係香港一線大型財團。兩樓盤的定價可以有咁明顯的差距，關鍵在於地皮成本同埋配套。睇番地價紀錄，南豐是於2014年初以約4.5億元投得豐連地皮，當時樓面呎價僅約2,139元；宏安地產夥拍錦華地產則於同年年中以約7億元投得薈朗地皮，當時買入樓面地皮呎價3,515元，即是麵粉價，宏安比南豐要多付六成成本。
地價成本的差異，令南豐開價可以較貼地。宏安開價較進取的原因就是贏了配套。今時今日，10個香港人買樓，10個除了睇價錢外，起碼9個半都會考慮到個樓盤有無鐵路接駁。由薈朗行去馬鐵馬鞍山站，不足7分鐘已到閘口。而且周邊有具規模的新港城中心及馬鞍山廣場，亦有一個小型街市及戲院，基本上衣食住行都可自給自足。
至於豐連則要先坐兩個站輕鐵，才可駁到西鐵兆康站，交通上，豐連呢嚇已輸咗。購物商場輸得更慘，要坐車去屯門市中心先至有大型商場V city同屯門市廣場，區內只有一個小型的盈豐商場同寶怡商場。
等緊上車機會，又或者想買豐連劏房而又抽唔到前籌的閣下，應該要思考一下，到底值唔值得多付80萬去買一個馬鞍山的劏房。
記者：黃嘉銘
財經評論 舊文
來源 source: http://hk.apple.nextmedia.com
