金融High Tea 2016年8月26日
地價沖天拉唔郁地產股
2016年08月26日
市場昨日話題唔係股市，而係樓市。賭王四太梁安琪旗下尚嘉控股，力壓另外十家財團，以逾十四億元投得屯門地皮，每方呎地價達六千八百元，直迫部份市區地皮造價，有人計過數話將來要賣萬四、五元一呎，仲係大碼樓，一眾中環茶友聽完都話點賣呀？
中港都係麵粉貴過麵包
四太勇冠三軍，佢嘅出價不但較市場估值上限高出七成九，同區地價更於不足一個月，急升逾六成六令市場大跌眼鏡，一舉創屯門區同類住宅地皮新高。
尚嘉行政總裁吳士元表示，整個項目投資額預計約三十億元，計劃興建低密度豪宅項目，主打中、大型單位，面積介乎二千至四千方呎，提供約八十至九十伙，預計於一九年推出。照呢條數計即係起錶價要三、四千萬一間，用呢個價錢住屯門，咁樣上車真係要用盡洪荒之力先得。
啲地咁值錢，政府快快手又賣，跟住會公開招標出售九龍筆架山龍翔道的新九龍內地段第6533號的用地，招標將於下周五(9月2日)開始，截標日期為下月30日，呢次睇吓市區地又會做到咩價。
中環茶友議論紛紛，有人話從呢排地價睇，樓價跌極有限。有茶友就不以為然，話呢排地價投到咁高，同內地財團落力出價有關，茶友形容呢個係地產市場嘅改朝換代。八十年代華資崛起，佢哋取態進取，喺地鐵沿線接連挫敗英資，取代龍頭地位，雖然過程中有財團出價過勇翻咗艇，最終都成功壟斷咗土地資源。O依家中資一樣係咁搶灘，睇番華資龍頭O依家個個有上千萬呎嘅土地儲備，中資如果唔用銀彈消耗戰，點樣可以落到嚟香港呢個咁好玩嘅金礦市場插旗。
茶友再加一點，喺內地O依家都頻頻出現地王潮，一、二線城市地價愈投愈貴，全部都係麵粉貴過麵包價，呢個現象同年初內地樓市回暖、內房商回籠資金大增有關。喺北水浸晒下，如果四太唔去到咁勇，都未必可以投到地。地價搶到咁貴，地產股都叫做郁吓，好似係北區好多地嘅新地(016) 就升咗1.4元，收報110.2元，但都過唔到近期高位，一來地產股之前已升咗唔少，二來咁多人爭地，長遠做發展商就唔易賺錢，所以雖然地價爆升，但昨日地產股普遍無乜郁動，內房股仲因為傳言阿爺見樓市又癲癲哋，開始出招壓抑而碌低。
地王潮下再傳房策收緊
有關內地調控樓市的消息近日開始多，其中傳出上海會在9月推出房地產收緊政策，一眾內房股下挫，中海外(688) 跌2.5%，造25.35元；華潤置地(1109) 降2.4%，造20.65元，中海外與潤地包辦藍籌最曳的成份股；萬科(2202) 走低1.5%，造19.7元；富力(2777) 急吐5.2%，造12.8元；合景泰富(1813) 降3.2%。
樓市搶晒鏡，股市對加息的情緒濃厚，恒指低開6點報22814點，早段跌幅擴至85點，隨後止跌回升呈好淡拉鋸，恒指收報22814點，跌5點；國企指數收報9504點，跌2點，成交680億元。
藍籌股比較好嘅係滙控(005) ，升咗0.45%，報55.45元；銀娛(027) 半年多賺26%，派特別息18仙，股價揚2%，報26.35元，受挫股價較矚目係騰訊(700) ，失咗兩百元大關，全日跌0.75%，報199.5元。另外晨訊(2000) 中期業績突出，集團中午公佈，上半年純利3101.2萬元，按年升88%；每股盈利1.2仙，推動股價午後抽升，收報0.34元，大升11.5%。
陸羽仁
金融High Tea 舊文
來源 source: http://hdfin.stheadline.com
