女神tea time - Fifi 2016年8月26日
女神tea time：
太明顯吧！一過禁售期就沽！
■中國糖果現價偏低，可買入博反彈。 公司網頁
TGIF！一星期又快過，唔知大家仲記唔記得，上周中港監管機構宣佈，批准深港通實施方案，然後個市都冇咩炒過，就咁而畀過面破過嚇上年11月以來高位就算，之後最新已震番落嚟，失埋十天線。
咁證明炒港股資金已變得聰明，經過一次又一次中伏，大家已明白個玩法係，如果個好消息係政策相關，特別係中國消息，一定係「春江鴨」先行，當消息公佈之時，就係見光死之時。所以假如今次閣下再一次高追了，咁就要記住呢個定律。至於下次要深港通再次借題發揮炒起，相信係正式通車前。
仲記得上年大時代後，一堆公司衝出嚟啤殼，配股上板炒一兩日再急插然後……玩完，結果搞到證監會想收緊上市規則。諮詢文件過唔過就未知，不過如果過咗，𠵱家嘅細價殼就更值錢。
去年11月同樣配股上市嘅中國糖果（8182），過咗半年大股東禁售期後，就即刻出手。最新公佈已喺星期二沽出1.5億股，每股作價0.115元，仲平過配股價0.2元。首先𠵱家創板殼價都值3億至4億元，但中國糖果市值只有1.5億元，現價平到冇人信，嚴重大偏低。
第二係，公司一過禁售期就做嘢，之後想點真係昭然若揭。以震昇工程（2277）為例，2014年上市，大股東又係半年後減持，一年後控股權易手，早前更公佈擬改名「華融投資」。主板殼價6億元，𠵱家震昇市值已20億元了。
中國糖果今次減持後，大股東持股只餘33.58%。中國糖果因為要保持控股權，所以至少喺11月前都唔可以再減持；現價等同最新減持價，相信喺11月前都仲安全。啤殼唔沽係冇用嘅，喺「大動作」憧憬下，可以買定博反彈。
Fifi
http://fb.com/lovefrystock
本欄逢周五刊出
Fifi
女神tea time - Fifi 舊文
來源 source: http://hk.apple.nextmedia.com
