大棋局：日圓賭命式實驗（完）
■相信黑田東彥仍寄望年初嘅負利率政策有效，咁日央行就唔使出大招。 資料圖片
日本現行貨幣政策嘅壽命只剩下兩年。日本央行揸住320萬億元（日圓．下同）日本國債，佔市場38%。日本財務省每年發新債30萬億元，而QQE買債規模80萬億元。即係
唔使兩年日本央行自己會揸住50%日本國債。
日本ETF市場規模約16萬億元，日本央行又揸住60%。今次擴大ETF購買規模到6萬億元，ETF資金池規模冇變的話，1年內已經玩完。所以黑田東彥今次只係求其交下貨，佢仲想等嚇。
自今年初開始，日本央行一出招，日圓就升、日經就插，因為市場睇死日本央行走入一條堀頭路，每出一次招就越接近盡頭。嚟緊只有兩個結果：安倍經濟學失敗，或黑田東彥最終配合/被撤換。要突破惟有做框架以外嘅事。做框架以外嘅事唔一定成功，但繼續做現行之事則死路一條。黑田東彥今年初曾謂，貨幣政策可能已經失效。貨幣政策嘅傳導性一般要半年到一年先影響到實體經濟，黑田東彥今次嘅表現反映佢仍寄望年初推出之負利率有效，咁就唔使局住出大招。
QE同直升機撒錢分別在於，QE喺二級市場買債，直升機撒錢則喺一級市場直接買。現時《日本公共財政法第五條》禁止日本央行直接買任何政府債券。不過呢條例有個缺口，就係「特殊情況下」，只要國會同意日本央行就可以咁做。乜嘢係特殊情況？可能係打仗，可能係天災，冇人知，冇寫明就代表睇時勢，有得拗。
除央行直接買債外，仲有發行永續債、零息債等方法。西方經濟學家好多諗頭，但通常自己唔做，走去拍人膊頭：「試嚇啦。」二十世紀初日本仍處於舊制度扭轉去新制度嘅改革期，故有「有前冇後，打死罷就」之意志。跳出現行貨幣政策框架而為，乃經國之大事。井上準之助同高橋是清兩任財相嘅下場歷歷在目，拿捏得唔好，後果無法想像。安倍晉三有呢個膽，但黑田東彥未有呢個覺悟。
Mr. Tregunter
本欄逢周二刊出
Mr. Tregunter
大棋局 - Mr. Tregunter 舊文
來源 source: http://hk.apple.nextmedia.com
