中環在線：
王冬勝馬時亨爭握財爺
■左起：馬時亨、曾俊華、王冬勝
財爺曾俊華早前去杭州出席二十國集團（G20）峯會，再次同國家主席習近平傾偈兼握手，令佢參選下屆特首嘅行程看俏。噚日佢應邀出席匯豐150周年活動時，竟然選擇封口，直情唔畀機會傳媒問佢問題，唔通費事講得多容易漏口風？
財爺
噚日去中環匯豐總行出席活動時，全程笑笑口，心情十分靚，匯豐副主席王冬勝、港鐵（066）主席馬時亨輪住同財爺握手，唔知有冇一路握手，一路八卦習總同財爺講過乜東東呢？
財爺臨走之前，大家當然想問佢點睇種種江湖傳聞喇，誰不知佢好瀟灑咁揮一揮手，咁就揚長而去。
讚紀念鈔設計有心思
講番匯豐今次活動，匯豐舊年承諾過，將發行150周年紀念鈔所得嘅4.77億元收益淨額，其中3.77億元撥入匯豐慈善基金。匯豐噚日宣佈，一共有11個項目成功取得撥款，包括青年教育、長者安老、環境保護等範疇。
曾俊華演講時提到，紀念鈔由籌備、設計到發售，足足花咗4年時間，佢讚設計者有心意，喺紀念鈔上用上好多為人熟悉嘅香港事物，滿載集體回憶咁話！雖然唔少人買紀念鈔，都係作收藏之用，但佢提醒大家，紀念鈔都係法定鈔票，若然有需要，都可以拎嚟用㗎。
李華華
mailto:LiWaWa@AppleDaily.com
李華華
LiWaWa@AppleDaily.com
中環在線 - 李華華 舊文
來源 source: http://hk.apple.nextmedia.com
