手機股爆發期漸過
2016年10月04日
內地黃金周假期，港股無左北水成交減縮，消息亦唔算多，反而英國首相文翠珊拋出脫歐時間表，鎊匯曾再度跌穿10算，創近三個月低位之餘，利好當地出口股，相關股帶動英國富時100指數突破52周高位6979點，最高見6980點，創逾16個月高位。
股
市有時真係估佢唔到，英國脫歐搞到全球腳軟，點知英國股市創左一輪新高，雖然計埋匯價無乜着數，但至少傷害無想像咁大。英國脫歐主要係因為唔想接受難民，呢樣嘢O依家就變左德國總理默克爾嘅大頭症，所以呢排德銀財政狀況惹人憂慮，當地政府都唔敢救市，搞到全球股市一陣驚恐。
富智康需求降發盈警
德銀嘅恐慌經過一輪反映，隨着上周五傳出賠償金大減，令佢股價大反彈，稍為紓緩市場緊張情緒，港股喺第四季首個交易日出現反彈。恒生指數高開355點報23652點，隨後升幅擴至401點，可惜午後升幅明顯放緩，恒指收市上漲左287點；國企指數收報9683點，升101點，因內地放緊假，成交金額只有486.4億元。藍籌股東亞(023) 升3.5%，造32.55元，跑贏一眾藍籌。
收市後富智康(2038) 發盈警，話預期今年底止年度綜合溢利淨額將少於1.1億美元，按年降至少52%、主因集團若干主要客戶因客戶轉型而降低需求，從而導致集團產品銷售預期少於57億美元，遠低過上年同期嘅75.5億美元。不過管理層就派吓定心丸，話下半年到目前為止之業績已有所改善，預期有關改善可令集團於今年下半年錄得之綜合溢利淨額，高於上半年錄得之綜合溢利淨額2082.3萬美元。
富智康近年業績都係浮浮沉沉，呢次佢發出盈警，除左反映公司嘅營運表現，仲令人諗到一個問題，就係手機相關股的黃金期是否已經過去。智能手機隨着蘋果推出iPhone出現爆炸式增長，消費者為了追尋強大嘅功能，不惜花錢不斷換機，但去到iPhone 6之後，雖然在內地仍受歡迎，但新手機帶嚟的刺激逐漸減少，O依家相關股份唔止話好難再推動盈利增長，甚至要維持都唔容易，所以最近開始傳出蘋果要求供應商減價的消息，但蘋果手機係暴利生意，一旦它的銷售唔得，靠慳係好難做到成績出嚟，呢個係最值得投資者關注嘅地方。相比之下，資金O依家開始更多投向應用嘅科技股，如果情況持續，蘋果稱霸的年代可能已經接近尾聲。
冠軍賣盤小股東唔盞
大市成交唔多，細價股又再度乘機突圍，背後多少係因為呢排股權易手消息不斷嚟。開源(1215) 飆1.3倍，收0.108元，為全日升幅最大個股；四間國企向航標控股(1190) 的大股東肖智勇洽購股權，航標炒高41%，收0.495元；蒙古焦煤(975) 大升27%，收0.4元。講起股仔賣盤，有中環茶友提到隻冠軍科技(092) ，佢嘅主要股東兼前任董事會主席簡文樂以退休為由，悉售持有的27.9%股權，總代價為2.7億元，以此計算，每股作價相當於0.1528元，作價較上周五收市價0.134元，有14%溢價。
冠軍昨日升20.2%收0.161元，叫做高過賣盤價，雖然買家無全購，小股東都叫做無蝕底。不過茶友話，冠軍過去有段時間盈利唔少，但派息唔係咁高，耐不耐又供吓股，若然係長線投資者，O依家都無乜着數，佢最唔明係公司過往賺錢又無點派過息，點解間公司資產淨值仲有77億，但用大股東賣盤價計O依家成間作價都唔使10億銀？佢話，當年公司賺錢唔少，派息唔多，到呢兩年唔係咁好景就無息派，O依家賣盤計數感覺唔多盞，所以話如果要長線投資，有股息落袋先至係實際。
陸羽仁
金融High Tea 舊文
來源 source: http://hdfin.stheadline.com
