財路：大孖沙煲鐵建裝備
■鐵建裝備股價貼近上市以嚟低位；圖為集團主席任延軍。 資料圖片
鐵建裝備（1786）食住鐵路高速增長期，主打養路機械好掂檔，但潛近上市底，淨現金仲要高過H股市值，冇有怕，跟一班基金大孖沙煲鐵建裝備，起碼博翻半番。
鐵建裝備係鐵路養路機械製造、維修商。據咨詢機構估
計，食住內地鐵路同城市輕軌興建，到2019年時，會為呢鐵建裝備呢瓣帶嚟54億元人仔市場規模。
鐵建裝備係亞洲第一大製造商，掂過碌蔗，仲未計嚟緊日子有嚟自一帶一路嘅財路。
鐵建裝備上年上市，即日見過上市以嚟最高位5.24元，現價3.13元，累跌40%，貼近上市以嚟低位，H股市值得16.6億元。鐵建裝備到今年6月尾，淨現金近19億元人仔，折約22.35億港元，仲要高過H股市值。鐵建裝備有靚仔前景，股價俾質到阿媽唔認得，爆殘！
家陣揸住鐵建裝備嘅有GIC（相當H股10%）、Baring Asset Management（約7.2%），同南車株洲電力機車研究所（8.3%），全部係大孖沙級數。早前投資者之一嘅社保基金，減持鐵建裝備到應佔H股5%樓下，揸鐵建裝備2,405萬股。呢日之後，鐵建裝備累計總成交股數超過3,400萬股。講係咁講，社保基金就算再掟清貨尾，斷估都清得八八九九。
場內專業評估，鐵建裝備明年EPS0.44港元，得7倍預測PE，比起行家HARSCO（美：HSC）預測27倍PE，足足平咗74%！
買鐵建裝備，現價翻半番到4.68元，明年預測10.5倍PE，未有耐追到HARSCO之餘，鐵建裝備比上市價潛水近11%。
錢雋
細價股專家
本欄逢周二刊出
錢雋
財路 - 錢雋 舊文
來源 source: http://hk.apple.nextmedia.com
