中環在線：
北上搞荔園 邱達根帶埋天奴
■Duncan嚟緊北上廣州舉辦嘉年華，希望一年一次。
荔園創辦人邱德根之子邱達根（Duncan）似乎決心將荔園呢個品牌發揚光大喎！過去兩年，佢以短租形式將荔園在港復活後，今
年聖誕至新年期間，就北上廣州舉辦嘉年華，仲會帶埋荔園吉祥物天奴大象北上㖭。
Duncan𠵱家擔任荔園主席，佢話荔園唔止係遊樂場咁簡單，而係一個大型娛樂活動製作品牌，佢希望將香港嘅遊樂場文化出口，所以首次承辦喺廣州天河南體育館舉行嘅「粵港澳工貿推廣及展銷會」，當作試水溫。
港難搵地「拎曬去起樓」
屆時10幾個荔園嘅經典攤位遊戲將會登場，同時有超過300個以港商為主嘅展銷攤檔。可惜場地負重有限制，擺唔到機動遊戲，但Duncan肯肯定咁話：「隻天奴大象會帶埋過去。」佢期望，將來可以喺更多內地城市舉辦嘉年華，例如北京、上海等一線城市，廣州就希望一年舉行一次。
至於香港仲會唔會有荔園呢？Duncan忽然好感嘆咁話：「香港最大問題，係唔夠用地，全部拎曬去起樓。」佢話家陣要搵20萬呎以上嘅用地，最多只能短租，搵地真係好困難。佢都諗緊，明年繼續在港以短租形式搞荔園，地點就未有定案。
講到尾，香港地，土地咁珍貴，到你真係投到幅地，又未必捨得用作遊樂場，賣樓嚇嚇講緊兩萬蚊呎喎。
李華華
mailto:LiWaWa@AppleDaily.com
李華華
LiWaWa@AppleDaily.com
中環在線 - 李華華 舊文
來源 source: http://hk.apple.nextmedia.com
