港交所價貴難升
2016年11月29日
深港通啟動有期，港股應吓景高開，但一如預期氣勢維持唔到好耐，收市只係升咗百零點。深港通嚟料，理論上對港交所(388) 最有利，不過，港交所卻未能受惠深港通落實通車，收報204.8元，跌0.1%。摩根士丹利仲吼正呢個時候發表報告，唱淡話佢貴，估值高。
金融股最緊要貨比貨
大摩呢次唱淡港交所，同陸羽仁之前睇法差唔多，就係佢市盈率高，但增長見唔到好大空間，只不過大摩份報告就有晒數字預測。根據該行推論，如果按照成交有790億元，相當預測明年市盈率逾40倍，估值高昂，並指其回顧在當年滬港通宣佈之時，港交所當時估值市盈率36倍，對比十年平均值30倍明顯偏高。大摩認為，深港通下周一(12月5日)開通，會持續擴大中港兩地資本市場互聯互通，在結構性層面對港交所有利，但相信今次市場反應或不如當年滬港通開通之前及之後一般時期般明顯。該行認為港交所唔值現時嘅估值，就算有咗港股通，畀夠佢有37倍市盈率嘅市值，目標價都係180元，所以股價仲係會炒落而唔係炒上。
大摩趁住深港通猛潑港交所冷水，大家應唔應該信佢呢？好以港交所呢啲高估值股份，我嘅形容係信者得救，意思係佢嘅股價全靠增長概念去吸引資金，而唔係靠真金白銀賺到幾多錢嘅硬功夫。如果佢增長高，大家信佢年年賺得多過之前好多，咁佢股價咪得囉，但自從去年下半年內地A股牛市爆破，港交所失去咗增長動力，仲係咪值幾十倍市盈率呢？港交所增長暫時交唔到功課，咁咪靠派息頂住先，所以佢派息都去到九成，如果未來盈利唔增長，要維持派息唔容易，當美國息口向上，咁佢派息嘅吸引力就下降咗啦。
陸羽仁買股係保守派，揀股其中一個標準係市盈率唔好太高，因為就算你有高增長，但已經喺股價反映咗，將來交到貨股價都未必可以再升，萬一「甩轆」就會股價大跌，值博率唔係咁高。好似港交所市盈率40倍，如果盈利高速增長一倍後放緩，都仲有20倍市盈率，所以你睇番基本上佢呢五年，其實股價都係上上落落，已經唔能夠創出歷史新高。O依家深港通已變好消息實現，未來佢仲有乜憧憬去維持高估值呢？會唔會係倫敦金屬交易所？呢樣嘢當然唔可以講成，不過係未睇到新希望前，就唔可以再將佢當係以前嘅高增長股去買。
如果再用貨比貨去睇，O依家好多內地或香港金融股，佢哋市盈率由幾倍到十幾倍不等，有啲盈利已經跌咗落嚟，基數細咗，未來反彈機會可能仲大啲，咁亦解釋咗點解今年港交所股價，跑輸香港金融股，只不過好多投資者無留意唧。
內銀跑贏深港通概念
其實，昨日個市好多深港通概念股都出現好消息沽貨，全靠內銀股撐住個市。券商股個別發展，好似耀才(1428) 跌咗1.7%報3.41元；時富金融(510) 跌1.04%報0.475元，反而深港AH股造好較多，晨鳴紙業(1812) 大漲7.9%報7.82元；金風(2208) 漲3.15%報12.46元，加埋多隻重磅內銀股造好。單是建行(939) 、工行(1398) 及中行(3988) 三大重磅內銀股力撐大市，為恒指貢獻51點升幅，其中建行走高1.22%報5.82元；工行升1.93%報4.76元；中行漲1.14%報3.54元。最後恒指收報22830點升107點，成交金額逾706億元。
新股方面，經營「越棧」餐廳的膳源控股(1632) 今日掛牌。根據輝立證券資料，暗盤價收2.9元，較上市價2元高0.9元或45%，不計手續費每手2000股，帳面賺1800元，如果有咁賺頭今日不妨考慮食胡為先。
陸羽仁
金融High Tea 舊文
來源 source: http://hdfin.stheadline.com
