財金冒險號：越防走資越係要走
■如果中國走資持續加劇，離「支爆」又近一步。 資料圖片
大陸禁止居民到境外碌銀聯卡買投資保險、大減化妝品稅、扣留澳洲皇冠賭場職員調查。呢三件事，有乜共通點？阻止走資也。自從人民幣於2014年初開始貶值，中國外滙儲備由4萬億美元跌至現時不足3.2萬億，
跌勢於去年「8.11」人仔急貶值後加快，到近半年又放緩，但貶值趨勢未變。比起大陸人到境外買樓，企業海外收購，上述行動杯水車薪。
挽狂瀾於既倒，扶大廈之將傾。出招阻走資，如果冇用都算，至怕阿茂叫狗，越叫越走。走資嘅嘢，越禁越驚。立法會宣誓都可以「釋法」成只可一次，資本管制當然可以肆無忌憚地收緊，例如每人每年換5萬美元嘅上限可以減。每出一招，居民憂慮就加深，就更加想盡辦法走資，情況好似傳聞某銀行唔掂，搞到擠提，間銀行冇事都變有事。
今時今日，全球經濟如果出事，好可能源於中國。如果走資加劇，離「支爆」就又近一步。參考97年亞洲金融風暴成因：一、金融開放，因而受外資衝擊；二、短債升、滙率貶、外滙儲備跌；三、股樓泡沫爆破，危及銀行體系。中國現時有七八分似，分別在於中國滙率非固定、債務雖高但外幣債少、股市已爆但樓未爆，所以「支爆」講咗咁耐都無兌現。最終爆唔爆、幾時爆，冇人有水晶球，投資者只能做好防風措施，同買定花生睇實特朗普。
笑笑生
mailto:sneeringman@gmail.com
本欄逢周四刊出
笑笑生
財金冒險號 - 笑笑生 舊文
來源 source: http://hk.apple.nextmedia.com
