經濟客艙：特朗普都係打份工
■想做總統好耐嘅特朗普，今次出選可以話係自己人生嘅一場豪賭。 資料圖片
「打份工啫」係打工仔嘅核心價值，安安穩穩過一日就一日，放工就是放工。不過，當政客或國家元首都以「搵食啫」做擋箭牌，掩飾同美化自己嘅惡行，送國家前途一程，真係多得呢
班「搵食啫」嘅人唔少。
特朗普選後無法兌現競選承諾，唔怕政治誠信破產。坦白講，亂搬龍門就梗㗎啦。特朗普係百份百嘅生意人，商人治國嘅路線，一切以利益行為大前提，政治正確與否，從來唔係首要考慮嘅事。如果特朗普當花旗國，係佢自己嘅公司管治，首要任務要做靚公司條數，將美國GDP提升一倍，合情合理。核心問題係，年屆70歲、講咗廿幾年想做總統嘅特朗普，今次出選係自己人生一場豪賭，想滿足個人好勝嘅心態，抑或決心改變美國同世界。
身家370億美金嘅特朗普，舊年全年收入5.57億美金，跟美國總統年薪40萬美金、連同每年5萬美金嘅開支補貼計，可能係特朗普眼中，兩者差別只係少個零頭嘅分別，競選時又講過出任總統期間，可以一毫子都唔收。特朗普登上美國權力之巔，唔只掌握美國經濟命脈，亦係全球責任最大、操縱各國集團利益領袖。40萬美金年薪好多咩？大概312萬港紙，每個月袋26萬港紙，我哋嘅特首梁振英每月袋緊37萬港紙。問題係從來冇人夠膽做總統話想用市價收費。總統係一份公職，為國家同人民服務，並非由一男子話事，全部經國會制定，以國家開支預算為大前提。
美國第一任總統華盛頓講過，做總統獲得工作嘅滿足感同尊重外，佢從來冇諗過得到其他獎勵。特朗普做總統都係同其他職業搵食一樣，政客都係打份工啫。
Captain Cool
https://www.facebook.com/seeforcaptain/
本欄逢周一刊出
Captain Cool
經濟客艙 - Captain Cool 舊文
來源 source: http://hk.apple.nextmedia.com
