金融股繼續靚仔
2016年11月16日
港股周一跌到去神奇數字22222.22點後出現反彈，但彈幅唔算好強，彈番101點，暫時大家仲係捉緊路，睇唔到個市有乜明顯利好消息。
美國大選後，成個投資市場環境轉左，反映美元兌六大主要貨幣的美元指數創左新高，即係話美元兌好多貨幣都上升，令人民幣呢排不斷下試低位，人民幣兌
美元即期早盤一度跌破6.86關口，低見6.8640，與中間價同創近八年低位，收報6.8530兌1美元，跌121點子。夜盤反彈135點子；至於離岸人民幣仍跌35點子，報6.8582兌一美元，較在岸收市價低52點子。
人仔短期壓力未消
交易員就話，美元指數於百點關口附近徘徊，阿爺在人民幣跌到關鍵點位亦沒有堅守，僅適度提供流動性，表明監管層對匯價波動容忍度提高，人民幣在購匯推動下貶值到全日低位時，才看到至少兩家中資大行拋售美元後，在岸人民幣貶破6.86元後止住跌勢，相信短期人幣匯價仍將承壓。
人仔呢輪跌勢轉趨明顯，市場認為有自保作用，藉以保護內地嘅增長同出口。申萬宏源首席分析師李慧勇認為，在2017年人仔還會再貶值5%，跌至7.3兌1美元。佢覺得，市場不應只將人民幣貶值當作利淡看待，價格是平衡市場供求最有效的工具。自八一一匯改後，除了利率外，匯率已經平衡市場供求的調節工具。睇番內地股市，雖然昨日微跌，但之前已經連升多日，印證左匯跌股升嘅市場規律。而掉轉嚟睇，港元兌人仔變相升值，對港股就帶嚟壓力。
要留意嘅係，金管局總裁陳德霖出席立法會財委會簡報會時表示，美國通脹正在上升，利率正常化步伐不確定，大選結果將會帶來更多不明朗因素。佢提醒由金融海嘯到現在，流入香港的資金達1300億美元，當美息正常化時，資金將會流走，惟料流走步伐循序及緩慢，咁即係話要留意美國加息後資金會由香港流走的狀況。
恒指昨日彈一彈，收報22323點，上升101點；國企指數收報9398點，漲55點，成交695億元。市場憧憬人民幣貶值將利好中國出口，輪到航運股及港口股有啲炒作，東方海外(316) 升6%，報31.5元；中遠國際(517) 走高5.6%，報3.75元；大連港(2880) 升4%，報1.48元。
恒生錢多加息有着數
睇番大市升幅雖然唔多，但金融股就相當亮麗，過氣銀行股王滙控(005) 同保險股王宏利(945) 雙雙創出一年新高，同時恒生(011) 升幅都好靚仔。滙控升1.6%，報61.6元；恒生升2.1%，報146.5元，恒生股價造好，估計係逐步反映下個月美國加息，宏利收報133.2元，升3.6%。
恒生本身自有資金比例好高，銀行水浸，搞到呢啲自有資金回報率大跌，銀行要搏命Sell客搵生意來填數，上上下下壓力都好大。若然特朗普真係谷番高通脹，息口回報高番，對恒生都有利。有中環茶友話，近年好怕去銀行，皆因見到大堂小姐佢就係咁sell，做少少嘢都拖佢半個鐘，希望可以賣到產品，如果息口高番，大堂小姐唔使孭咁多數，佢就唔會有銀行恐懼症，咁就真係你好我好大家好。
陸羽仁
金融High Tea 舊文
來源 source: http://hdfin.stheadline.com
