人仔喘穩利反彈
2016年11月23日
港股昨日爆升三百點，跌左咁多日，反彈吓都好應該。睇番上升股份，可以話係憧憬美國新政嘅「特朗普紅利」。
恒指單日勁彈，有人歸因美股再升。美股自大選後已經創左新高，但港股一直跟唔足，我反而覺得係因為A股造好同人仔跌勢稍為喘穩有關。呢排少左人講內地股市，實際內地股市表現唔錯。
滬深兩市昨早已高開高走，權重股集體發力，帶領上證指數再創10個月新高，午後創業板指數亦迅速上升衝高。上證指數全日收報3248點，大漲30點；深成指報10985點，升85點；創業板指報2177點，漲幅25點。
A股回勇 人仔喘定
至於人民幣終於結束左十二連跌，據中國外匯交易中心數據顯示，人民幣兌美元收市回升76點子，報6.8880兌1美元，中間價大漲逾200點子。惟離岸人民幣仍跌51點子，報6.9096，較在岸收市價低216點子。
港股呢排咁弱，一大原因係人仔腳軟，搞到大家囉囉孿，咁人仔企穩恒指咪彈番一下。不過，內地券商就分析，愈來有愈多跡象內地經濟係降緊溫，包括11月以來商品房銷售同比急降、發電耗煤和高爐開工率回落、交通核心運輸見頂。內地東北證券就預期，實體經濟喺反彈過後會再回落嘅機會好大。
內地經濟因為放鬆左樓市帶動一輪反彈，但持續力成疑。同樣情況，人民幣雖然結束十二連跌，咁可能只係代表左最急勁嘅一段回落暫告一段落，但唔排除仲有後續較溫和嘅跌幅，O依家普遍估計，人仔明年若然再跌多5%見底，已經叫做幾好。如果按呢個推斷，短期內人仔下調對港股嘅壓力可能係稍為紓緩，但仲未完全過去，港股中長期就無咁快話好就好，短期會彈吓都唔出奇。
金融股資源股變贏家
睇番昨日上升嘅股份，好多都同特朗普上台引起嘅憧憬有關，好似陸羽仁提過嘅昔日保險股王宏利(945) ，昨日彈升1.5元，收報134元，創左一年新高。
其他金融同保險股，都繼續炒利率正常化令回報增長，滙控(005) 、友邦(1299) 、建行(939) 、工行(1398) 及中行(3988) 等重磅股成升市動力，僅此五股已為恒指貢獻135點升幅，其中滙控重上61元，收升1.5%報61.7元；友邦漲1.2%收報47.2元；建行走高2.2%報5.62元；工行收升2.5%報4.6元；中行漲2.1%報3.43元。
內銀股向好外，內險股亦延續周一升勢，國壽(2628) 漲2.9%報21.55元；平保(2318) 走高2%報42.65元；財險(2328) 升3.3%報12.48元；新華保險(1336) 升2.15%報38元。
喺呢班大隻佬推動下，恒指收報22678點，升左320點；國企指數收報9651點，漲206點，成交金額700億元。
特朗普搞經濟同奧巴馬唔同，佢比較注重刺激實體經濟膨脹，同奧巴馬政府唔花錢、只由聯儲局放水入債券或房地產唔同，所以資金換馬會隨著佢政策變化發生。新總統另一概念係搞基建，相關金屬股再現鑊氣。鐵貨(1029) 爆升23%收報0.325元；新鑫礦業(3833) 大漲15%報1.29元；中信大錳(1091) 走高10%報0.55元；俄鋁(486) 升6%報3.24元；中國稀土(769) 升7%。
陸羽仁
金融High Tea 舊文
來源 source: http://hdfin.stheadline.com
