Money Walker：
「低慾望社會」對經濟未必有害
■日本有學者早前提出「低慾望社會」的講法。 資料圖片
日本管理學家大前研一早前提出「低慾望社會」嘅講法，意指日本年輕人物慾極低，對買衫、買車、美食等慾望不大，更莫講話結婚買樓。大前認為呢個社會現象，解釋咗點
解日本政府嘅一系列經濟政策一直無法刺激當地消費，無助改善經濟。
年青人「低慾望」可能已形成社會現象，但筆者就覺得情況只限於物質層面上。𠵱家嘅年青人可能冇以往世代嘅年青人咁重視物質，但並非全無慾望。佢哋降低嘅只係物慾。事實上，喺減少物慾嘅同時，年青人亦開始更講究身心健康、環保意識、自由平等，並透過減少工作同消費去達到呢啲追求，傳統主流社會對此無法完全理解亦屬正常。
傳統經濟學認為消費減少會對經濟有害，亦唔會將年青人喺價值觀上嘅追求，視為尋找另一種經濟發展模式嘅契機。但當人類長期不斷耗用地球資源嘅經濟發展模式無法永續，筆者認為「低慾望社會」反而可以作為進一步推進共享經濟、循環經濟、網絡經濟等嘅土壤，甚至可望為未來經濟持續發展，開闢一條新出路。如果一味只視年青人減少消費為問題，並且將刺激年青人物慾視為重燃日本經濟嘅動力，無疑係用舊思維解讀新社會，走唔出傳統框框。
有人話香港都有「低慾望社會」嘅情況，筆者就認為呢代香港年青人未至於低慾望，只係消費模式有變，唔再一味熱衷名牌，而係更重視消費體驗，亦多咗網購同外遊，少咗喺實體店買嘢。面對上述變化，傳統零售業除減價外，亦需認真思考如何提高實體店吸引力，只將消費減少歸咎於「低慾望社會」，並非解困對策。
El.
http://fb.com/moneywalkerhk
本欄逢周三刊出
El.
Money Walker - El. 舊文
來源 source: http://hk.apple.nextmedia.com
