笑到最後：香港再做買辦角色
■特朗普上任美國總統，中美貿易添不穩定。 資料圖片
三周前本欄推介彩星玩具（869），當日開市價1.23元，上星期最高升至1.63元，最多升32%。上周五收報1.49元，仲係升超過21%，只要喺11月21日「不問價追彩星玩具」，當日開市1.2元水平任買，
買入後等唔夠一個月，已經升兩至三成。
目標價繼續睇兩蚊，因為：一、公司現金10億元，派息不變仲有6.7厘股息率，有得守；二、除咗本欄繼續睇好忍者龜外，上星期孫柏文話公司簽咗嘅百獸王受好評接棒做增長動力；三、管理層1.2元回購，至今反彈穿咗7月時1.4元橫行嘅位，即係下半年入市嘅人之中已經冇蟹貨，重返今年高位2元唔難。
上周末梁振英宣佈唔會角逐連任，大家鬆一口氣。有啲人可能會話：邊個做都一樣？高明會答：你講呀？梁振英任內對香港最大破壞，就係佢嘅語言偽術激發好多奴性重嘅人，俾佢吟兩句吟甩咗就算，對有權嘅人無限包容；另方面，呢啲奴性重嘅人若身居稍有權力嘅職位，就會有樣學樣。DQ梁振英，令人覺得有權唔可以用盡，行事準則解釋清楚，唔再講兩句吟甩，社會風氣應該冇沉淪得咁快。
至於DQ梁振英嘅另一種解讀，就係美國當選總統特朗普對中國強硬，莫講話人民幣自由兌換，就連中國已經享有嘅貿易出口都可能受到圍堵。放棄梁振英嘅原因包括，一、中國中央已經好忙，未來四年香港唔好搞事；二、香港係自由港，亦係中國嘅買辦，歷來作用係對沖中國嘅不幸，就算中國受到貿易制裁，都可以靠香港呢個「老鼠窿」進行買賣，如果香港變成中國其中一個城市，一齊受到制裁一鑊熟，惟有維持「一國兩制」，當買個保險。
如果呢種解讀正確，歷史洪流又回到中國要依靠香港嘅時候，香港嘅買辦角色係中美又要嗌交又要做生意之間妥協嘅橋樑。結論係咩？就係彩星玩具呢類買辦出口股，將會係歷史狹縫之中嘅受惠股。
高明
http://www.fb.com/bigricetea
本欄逢周一刊出
高明
笑到最後 - 高明 舊文
來源 source: http://hk.apple.nextmedia.com
