魚樂無窮：
德國股神好波！
■膳源連日爆升，引證德國股神「趨勢=資金+信心」理論。圖為膳源主席黃志堅（左一）及其家人。 資料圖片
德國股神科斯托蘭尼講過，趨勢=資金+信心，後生一輩會覺得佢吹水，但經過噚日半新股喪炒一役，唔少人都信服到五體投地。
「越南河」股膳源（1632）連升七日，
累積升幅超過七倍，最終激發全體半新股的小宇宙，升幅榜頭五大全屬半新股，其中做卷煙包裝紙嘅盟科（1629），單日曾經狂升1.4倍，成交超過3億銀，打入二十大成交榜，勁過唔少藍籌。
事實上，相關股份基本因素，唔會在上市後短時間180度轉變，說穿了大家見到膳源爆升，對半新股信心增加，繼而真金白銀搶貨，結果構成百花齊放嘅美麗圖畫。
炒新股有乜秘技？記住，炒股係心理遊戲，當大家都相信同一條方程式，股價就會升，贏人哋嘅方法只得一個，就係快人一步。好似今朝咁，小部份新股開始發癲，你就要即刻搶入未炒起嘅半新股，要贏錢冇難度，現今資訊發達，上網㩒個掣就會睇到。
當然，事後孔明好易，如果走勢不似預期又點？所以掃貨時要計定數，自己可承受風險有幾大，前輩教落，入場時唔係諗贏幾多，而係諗可以輸幾多，呢個理論終生受用，共勉之！
唐牛
http://www.fb.com/tongcow88
本欄逢周二、四刊出
唐牛
魚樂無窮 - 唐牛 舊文
來源 source: http://hk.apple.nextmedia.com
