財經評論：
儍人先夠膽識買樓
■早前有年輕買家以420萬元買公屋竹園北邨，俾網民笑「儍仔」。 資料圖片 
現時買樓賣樓比之前方便得多，隨時上網就找到所需資訊。業主賣樓，覺得地產經紀信不過，自己上網「格價」，再決定放售單位叫價。於是，連買樓也成
為新聞主角。買得貴，俾人笑儍仔。
因此，若涉及到一些特殊成交，例如成交價偏高及偏低，地產經紀多不願意對外發佈，怕影響買家及賣家，搞到代理傭都冇得收。試過有買家第二日睇報紙先知自己做咗儍仔，鬧爆代理，最終撻定。
黃大仙竹園北邨一個實用面積447方呎公屋，最近以420萬元售出，樓價打破九龍公屋最貴紀錄。買家是名80後，獲家人出資百萬首期上車。市場熱烈討論居然有「儍仔」四球買公屋。不少花生友都笑買家儍，400萬元私樓都買到。最重要是隔籬鄰居只是每月交租2,000蚊，有時更獲免租。仲講到話買家如有100歲命，租100年都是240萬元。有留言更指，「隔籬屋攞綜援嗰啲仲有津貼」，又指能說服買家用400萬元入市公屋的地產代理，「簡直係神人」。
香港本土特質，就是憎人富貴厭人貧，甚麼也鬧一餐。但鬧還鬧，一切都是畸形樓市所造成的結果。當車位炒到460萬元時，你便會覺得公屋賣420萬元並不是一件驚天動地的事。今日的公屋，仍叫做400萬元買到400呎，再不買，出年只買到300呎，再過多兩年，100呎公屋可能要400萬元。邊個先係儍仔，冇人知。
6年前全港首宗樓價升破200萬元的黃大仙公屋，買家同樣被諷儍仔，但又有甚麼儍得過該單位升值已至逾400萬元。一直以來，儍人先夠膽色買樓，得把口通常冇樓。
記者：朱連峰
財經評論 舊文
來源 source: http://hk.apple.nextmedia.com
