舉牌股遇北風
2016年12月06日
深港通首日開波，可惜出師唔係太老嚟，遇著意大利公投，結果總理倫齊繼英國首相卡梅倫後，成為另一個中招歐洲政客，令到意國以至歐盟政局驟添不明朗因素，加上中國證監會主席劉士余批評舉牌收購的做法，港股變咗想升都難。
意國公投失敗好濕滯
昨日兩個
不利消息，都有本身的深層意義。先講意大利嘅公投，本來總理倫齊想修憲加強行政效率，點知變成選民表態對政府不滿的機會，間接將首相拉咗落馬。
分析家理解呢個結果唔多唔少反映選民對政府處理難民同經濟不景嘅政策。有人將佢擴大到呢種情緒會唔會喺歐洲陸續爆發。由於法國已準備進行大選，外界擔心法國大選都會出現呢種民粹反應，令整個歐盟團結出現問題。中銀香港(2388) 首席經濟學家鄂志寰就話，唔排除呢個結果日後會有骨牌效應，亦令人擔心意國銀行業狀況。佢估計歐羅兌美元未來有跌至一算的可能。
歐盟自脫歐後引起的不安非但沒有慢慢消散，反而有傳染歐洲大陸的傾向，聽落都已經夠煩。不過，由於市場之前已有小小預咗呢個結果，所以股市初步反應唔算好大。但再經呢次意大利總理失蹄的教訓，歐洲政要都咪話唔心驚，估計歐洲央行今後唔敢輕易撤銷量寬。就算係咁區內政經情況仍然係好脆弱，隨時都會出現顯著波動。
同意大利公投相比，中證監主席劉士余日前出席論壇炮轟「舉牌股」的言論威嚇力仲大。劉仕余在日前舉行的投資基金協會上，批評來路不當的資金從事槓桿收購，行為上從門口的「陌生人」變成「野蠻人」，最後變成行業嘅強盜。這是在挑戰國家金融法規的底線，也是挑戰職業操守的底線。他強調，舉牌、要約收購上市公司是可以的，但對象應是治理結構不完善的公司，如果是用來路不明的槓桿收購就不可以，是「人性和商業道德的倒退和淪喪」。
熱錢舉牌叫陣惹不滿
劉士余這番話，被視為收縮併購的先兆，特別是一些運用保險資金對國有企業或資產進行強勢收購的交易。內地A股在呢番話後出現回調，特別係個別「舉牌股」壓力較明顯，近日不斷獲增持的萬科A股一度下插半成，由壽險公司持有主要股權的格力電、中國建築都受壓跌停。
劉士余呢番講話，相信係有的放矢。內地近年游資氾濫，追逐有限資產，部份資金流出國外大搞收購，中資日益關注呢啲併購究竟有無唔健康情況，包括借意調資去外面。至於喺內地，中央都關心到熱錢會唔會連國有資產都會被人買起，令到國家蒙受損失，O依家劉士余開咗聲，大家就好緊張佢有無後續行動，針對呢啲舉牌叫陣嘅公司。
滬深股市雙雙下跌，上證綜指收報3200點，跌43點，深成指跌124點，收報10787點。深圳股市下跌，咁深港通又點有炒作氣氛呢？
深港通唔多得，港交所(388) 收跌2.66%報197.4元；南下的港股通首日流入只有8.5億元人民幣，深港AH股卻普遍隨大市下跌，金風(2208) 跌2.97%報11.78元；東北電氣(042) 收跌3.78%報2.8元；鞍鋼(347) 跌2.4%報4.39元；山東墨龍(568) 跌3.84%報3.26元；浙江世寶(1057) 跌3.6%報10.58元。不過新華製藥(719) 升1.2%報5.81元；麗珠醫藥(1513) 升3.85%報49.8元。睇嚟炒深股AH差價，除咗睇水位，買業績同派息好啲嘅股份都會多咗重保障。
喺意國公投同舉牌股腳軟下，恒指最多跌189點，低見至22375點，好彩收市前跌幅逐步收窄。恒指最後收報22505點，跌59點；國企指數收報9711點，下滑69點，成交金額688億元。日本眾議院通過賭場法案，兩隻日本彈珠機股爆升，NIRAKU(1245) 大升102.86%，報1.42元；DYNAM(6889) 則漲37%，報15.18元，成為跌市下的一路奇葩。
陸羽仁
金融High Tea 舊文
來源 source: http://hdfin.stheadline.com
