智取大市：
要刺激好易輸錢
■散戶近期無心戀戰。 資料圖片
悶市，股市升緊，又唔係散戶買緊，當然係大戶正在買貨。大戶點先贏？就係吸引新落場嘅人加入一齊買，成交一多，就係大戶出貨嘅時間。踏入2017年初，冇乜風險因素，同時冇乜利好因素未反映，所以整體大市唔會太驚、又唔會太喜，直至形勢出
現變化。今年第一季嘅策略，應該係趁港股低位、同時風險較低嘅時候買，成交一大，就要防冚檔時間到，要減倉。
散戶近期無心戀戰，難怪嘅，恒指反彈過千點，要數二三線強勢股，最強例如吉利（175）、玖紙（2689）升超過一成，但大部份二三線股升唔夠一成，覺得冇肉食，散戶不如消極唔落場。不過，喺未來三幾個月內，大家要習慣呢種慢速，一味等到大市夠刺激先買，好容易接火棒。記住，炒股寧願悶悶哋咁贏，都唔要好刺激咁輸！
玖紙之前講過庫存係海嘯新低，證明紙業股復蘇，玖紙一接近8蚊，講緊係五年阻力位，點都有人沽貨食咗糊先，腳軟好正常。不過，紙業股難得遇上好天氣，龍頭股腳軟之際，資金炒落後又何妨？大冷門股森信（731）一年最多炒一轉，睇番隻股年半冇炒過，趁紙股有人吼，話唔埋追落後。先旨聲明，成交疏落，細注。
晉佳
http://www.fb.com/advanceguy1
本欄逢周一、三、五刊出
晉佳
智取大市 - 晉佳 舊文
來源 source: http://hk.apple.nextmedia.com
