金融High Tea 2017年1月11日
想博要吼工業股
2017年01月11日
港股呢排成交偏低，內地限制資金來港，股市交投少左，但似乎唔影響超豪宅成交，最近山頂有塊地賣出，據講成交價去到32億元，樓面呎價去到12.5萬元，有中環茶友就話，唔怪得手頭揸住唔少豪宅嘅大昌集團(088) 呢排急升，可以叻過龍頭地產商啦。
工業家豪掃超豪宅
呢次山頂塊地賣到好價，成為茶友話題，皆因呢塊地位於普樂道。普樂道最出名嘅豪宅係「天比高」，當年係滙控起畀大班沈弼住嘅，後來接任嘅大班浦偉士唔鍾意，於是就沽左佢畀八佰伴嘅和田一夫，可惜和田頂唔順間咁有霸氣嘅屋，終於破產收場。天比高結果難逃拆卸命運，之後賣左畀周星馳同胡氏家族，在塊地上面再起嘅大屋係最早呎價直逼10萬大關嘅超級豪宅。
至於今次豪宅買家楊建文，係做手機屏幕的玻璃大王，佢嘅公司伯恩光學有傳上市嘅話，市值逼近1000億元，所以外界估佢用幾十億元買塊地建行宮只係濕濕碎。好似楊健文呢啲超級富豪鍾情港島超級豪宅，令到呢類單位身價驚人，好似大昌O依家喺寶吉道一個項目有幾間屋仔，固然值錢，另外佢喺淺水灣又有個項目，所以呢排佢股價好硬淨。
大昌係老牌發展商，作風好保守，買地起樓唔借錢，股價跑得比較慢。近排急升後昨日佢收7.55元，派息接近4厘，睇落好吸引，但以佢嚟講呢個息率已經算偏低，皆因佢估值一向低，買佢嘅人多數貪高息，股價上升後得番4厘息。由大昌升到咁高，間接都反映到超級豪宅價錢幾貴。
有茶友話，近呢十幾年做工業最發係跟住蘋果做智能手機，好似伯恩光學咁，仲有幾間上左市嘅舜宇光學(2382) 、瑞聲科技(2018) ，老闆都大把身家，買磚頭股好似大昌夠穩陣，但想博就要吼工業股。最近佢就留意隻信利(732) ，呢間公司產品無咁專，主要業務為製造及銷售液晶體顯示器產品(包括觸控屏產品)及電子消費產品，包括微型相機模組、個人保健產品及電子設備。去年第三季度業績，公司純利5.66億元，按年跌左3.9%。不過，佢最近幾個月股價回落，但生意額又回升番，以10.6倍市盈率，息率有3.2厘，估值似乎唔係貴。
百貨股要有磚頭傍身
個市呢兩日有番啲股搶吓眼球，都係因為市況穩番，有啲短炒氣氛，咁嘅環境同阿爺一開年就夾高人仔，嚇窒左班空軍有關。個市昨日在美元回吐的大環境下繼續反覆向好，臨近收市出現突破，一口氣升穿22700點，更以全日高位收市，全日收報22744點，漲186點；國企指數收報9664，升61點，成交金額623億元。
今年農曆年過得早，濠賭股提早炒，大行瑞信預期澳門今年1月份博彩收入強勁，濠賭股借勢炒作，新濠環彩(8198) 大漲9%，報0.36元；澳博(880) 漲3%，報6.26元；美高梅(2282) 升4.4%。
銀泰商業(1833) 公佈獲阿里巴巴投資等股東以逾42%溢價提私有化，銀泰股價急升36%，報9.54元。連帶超市百貨股亦造好，聯華超市(980) 、茂業(848) 、百盛(3368) 都升近5%，港資嘅新世界百貨(825) 都走高3.9%。百貨股近年受網購影響生意難做，但好多早年賺埋儲落唔少磚頭傍身，關鍵只係呢啲資產有人買就值錢，無人買就變左冷門股，所以高追不如候低吸納啦。
陸羽仁
金融High Tea 舊文
來源 source: http://hdfin.stheadline.com
