操盤手劄記：
又一狂人概念板塊
■特朗普將於下周五就任美國總統。 資料圖片
港股今年開局唔錯，首周由22000升到22500水平；本周迄今更升抵22935，一度高見22944。恒指已連升五日，收復100日線，兼10日線上破20日線，出現黃金交叉，加上成交增加，上升動力未盡，破23000
關在即。等買平貨嘅，又要再等多陣。
恒指上周急升，皆因人民幣挾淡急升，迫使做淡中資股嘅淡友冚倉。阿爺動用外滙儲備穩定滙率，人民幣兌美元暫時守住七算，但燒外儲救滙，頂得幾耐？外儲已連跌6個月，上月只剩3.0105萬億美元，較高位縮水24%。以內地居民每人每年可兌換5萬美元計，若有6,021萬人同時兌換5萬美元，就會即刻換光外儲。大陸有13.7億同胞，個尾數都唔止6,021萬人！
特朗普將於下周五就任美國總統，埋班惹嚟唔少爭議，例如搵女婿Jared Kushner出任白宮高級顧問，以及搵對華鷹派出任商貿要職。佢又打算加強國防，對軍艦同戰鬥機投資，每年增加900億美元，以重塑美國嘅軍事領導地位；並選定海軍陸戰隊退役將軍James Mattis出任國防部長。中國唔會坐視不理，預計3月兩會時，將會宣佈大幅提高國防預算，以應對南海爭端升溫及美台加強軍事合作。另發改委已表明，喺包括軍工在內嘅七大領域開展第一批混改試點。《中國證券報》披露，軍工科研院所分類改革方案已下發各大軍工集團。
咁嘅形勢，軍工股有運行。軍工股幾乎全屬係國企，因此行業重組、注入資產嘅可能性好高。中國航空工業集團旗下有四間本港H股上市公司及四間內地A股上市公司，一旦提高國防預算，中航工業最有望受惠，尤其旗下中航工業（232）及中航科工（2357）。
野村日前發表報告指，中航科工估值吸引，受惠中國防衛預算持續增長，而且國內防衛市場近乎壟斷，維持買入評級，目標價7元。睇走勢圖，該股呈現多重利好訊號，包括頭肩底、三重底、杯柄突破，現價5.55元，相對野村個價有26%水位。
割柑人
本欄逢周四刊出
割柑人
操盤手札記 - 割柑人 舊文
來源 source: http://hk.apple.nextmedia.com
