炒金屬股有竅妙
2017年01月12日
港股反彈持續，距離兩萬三千點只係一步之遙。個市想升就要搵理由，呢兩日中央出嚟唱好經濟，成為大市向上嘅藉口，仲乘勢再炒作吓礦業股。
國家發改委官員日前舉行新聞發佈會上，調子唱得比較好，強調過去一年，內地經濟社會保持平穩健康發展，一季度、二
季度、三季度GDP增速都是6.7%，預計全年也可以在6.7%左右。官員強調，去年前三季度，服務業增加值佔比已升到52.8%，比第二產業高出13.3個百分點。消費對經濟的貢獻率已經達到71%，比上年同期提高了13個百分點。官員仲明言，外界預言中國會出現崩塌式的調整，是不會出現的。
跟住內地商品期貨走
早前，阿爺定左今年不會勉強要求增長達到6.5個百分點，取態較為保守，相比之下，發改委最新口徑雖然相差不遠，但重點就放左喺中國唔係好似外界想像咁差，而且強調對未來維持增長有信心。
北京官員有咁嘅表現，我估同新年頭開局，外資好似想一舉踩低人民幣有關。為左對應大鱷踩上門，阿爺先喺離岸市場大力抽乾水夾人仔息，先硬撼炒家一嘢，但炒家唔係水兵，佢地沽空得人仔，主要就係睇淡內地經濟。好似呢排商品大王羅傑斯都轉軚，唱好俄羅斯唱衰中國，認為特朗普上台，不利中國，睇淡中國資產。阿爺出嚟唱番好，唔係巧合或者有碗話碗、有碟話碟咁簡單，估計正係要抗衡外界呢種論調。
中港地產股有錢入
外界將部份注意力暫時由匯價轉到去中國經濟基本面，昨日國家統計局就公佈，工業生產者出廠價格指數(PPI)飆升5.5%，遠超預期並創下2011年9月以來新高。內地12月PPI大升，是受大宗商品價格攀升、人民幣貶值因素影響。內地大宗商品期貨炒風升溫，昨日內地鐵礦石期貨一度升至漲停，收盤升7.9%；焦碳、焦煤升逾7%，成交量大增。本地掛牌嘅金屬股於是再炒個不亦樂乎。哈薩克礦業(847) 急升左9.5%，報38.2元；鞍鋼(347) 升6.8%，報5.34元；中鋁(2600) 升6.7%，升3.5元；馬鋼(323) 升6.3%，報2.54元；金川(2362) 升5.4%，報0.59元；江西銅業(358) 揚4.4%，報11.94元。
金屬股炒得咁開心，大家話係憧憬中國重新啟動基建，同時去產能有效，呢啲說法唔可以話錯晒，但內地商品期貨炒風影響仲立竿見影。對於未來嘅數據表現，中國國際經濟交流中心信息部副部長王軍認為，隨著房地產市場放緩，投資收縮，未來對大宗商品價格將受限，去年底PPI的凌厲漲勢不會延續太久，今年首季度PPI仍會延續反彈效應。咁即係話商品期貨炒完第一季，就未必可以再炒數據，屆時一係就搵到另一個理由，否則炒風可能告一段落，跟炒金屬股者短期仲有得玩，但咁上下時間就要睇住節奏隨時變招。
個市夾開有條路，造淡嘅熊人呢排都要捱吓，大市昨日午後一度升200點，高見22944點，想衝兩萬三千點大關，恒指最終收報22935點，漲190點；國企指數收報9733點，升69點，成交金額698億元。呢次衝關藍籌股普遍向好，滙控(005) 彈升0.8%，報63.85元；騰訊(700) 本周好威猛，終於重上200元，報200.8元，升1.4%。
中港地產股都有資金流入，多間大行唱好本地地產股下，信置(083) 升3.23%，報12.8元，為表現最佳藍籌；新世界發展(017) 走高2.9%，報8.94元。內房股亦見資金流入，保利置業(119) 大升7%，報2.86元；湯臣(258) 漲6%，報3.07元；大股華潤置地(1109) 、中國海外(688) 升1.8%。
陸羽仁
金融High Tea 舊文
來源 source: http://hdfin.stheadline.com
