智取大市：
TVB準備翠如化
■TVB係傳統企業，仲要做過藍籌。 資料圖片
當大家講緊翠如BB股聯旺（8217）市值成309億元，差唔多買得起三間TVB（511）嘅時候，呢個現象反映兩個訊息。第一，𠵱家啲殼股有幾貴得幾貴，因為A股一隻殼閒閒哋幾百億元市值，300億元翠如股so wha
t？第二，反映TVB股價有幾殘，講緊壟斷香港免費電視市場，以前收市價26.6元計，市值竟然得116.5億元。
TVB同翠如股嘅分別，就係翠如股上市時街貨等如零，𠵱家不見得多人揸手，鍾意點舞都得；至於TVB係傳統企業，仲要做過嚇藍籌，於是吸引一味貪平、耐性十足嘅基金股東坐貨，一於等到佢升為止，偏偏TVB大股東包括殼王陳國強，最擅長搵街外人錢，殼王嘅利益，同班基金股東某程度形成對立關係。
TVB回購股份一嚟想用偏平而有溢價嘅價錢作妥協，希望基金股東有少少甜頭就願意畀貨TVB，換來一隻貨源歸邊嘅股，實行將TVB「翠如化」。劇本顯而易見，同TVB嘅師奶劇簡直係相映成趣，事實有冇咁簡單？你先睇睇佢哋嘅神劇吧，天台齊齊BBQ嘅大團圓結局之前，總有19集要演落去，中間梗係加插啲懶緊張嘅佈局。買唔買得過？如果佢裂口高開到30.5元左右或樓下，仲玩得過。
晉佳
http://www.fb.com/advanceguy1
本欄逢周一、三、五刊出
晉佳
智取大市 - 晉佳 舊文
來源 source: http://hk.apple.nextmedia.com
