生意難做玩吓財技
2017年01月25日
臨近春節，港股繼續陰陰哋升吓，由於成交少，唔排除個市會幾CHOK吓。個別板塊輪流炒，中環茶友話，個市O依家炒上落，搵食方法睇住幾個反覆向好嘅板塊，升時沽貨、跌時入貨。好似昨日有幾個板塊上升，咁可以考慮食吓胡，入番啲唞氣嘅板塊好似石油同石油設備
股，出出入入博密執。
港股個別發展，開始跟住業績炒吓，紙業股呢排都出嚟預先盈喜，股價相繼續高。玖龍紙業(2689) 發盈喜，表示倘撇除經營和融資活動的匯兌虧損(扣除稅項)，預期截至去年12月底止中期業績，盈利按年增長不低於45%，主要由於期內的銷售收入錄穩步增長所致。玖紙早前因為人民幣匯兌損失大，股價受壓，好消息公佈後股價即彈近一成，收報8.78元。
反覆買賣績優股
紙業股板塊其實過去一年表現唔錯，主要係幾年前佢哋大炒一輪，各企業大力擴張，結果形成大家好多債，要學財爺話齋休養生息，經過幾年鞏固期，內地市場好番，所以紙業股普遍業績有改善。早前大行預期，過去一至兩個月成本下跌，商品開始轉勢，相信玖紙2017年進入復甦期，雖然玖紙股價於過去一年已跑贏國企指60%，但仍有上行空間。
玖紙盈喜，帶動咗其他紙業股都造好，理文造紙(2314) 昨日收6.94元，升4%，晨鳴紙業(1812) 收8.9元，升6%。
內地紙業股脫離咗早幾年大力擴張嘅時間，形成競爭減少，大型紙品股都各有本身市場。晨鳴係國企，年前提出打造千億企業嘅目標，全力整合加強效應，去年09月30日止9個月第三季度業績，股東應佔溢利為 15.5億元人民幣，同比增幅 176.9%，每股基本盈利 0.74元人民幣，佢O依家息率有4%，如果市況唔太差，股價睇嚟想挑戰新高。由於佢股價一日升咁多，有貨在手可以沽啲套現，買番啲未升嘅板塊，等佢回落再吸番，希望一注錢可以走多兩轉。
O依家個市唔係大牛市，大家都係用有限資金買貨，所以就算好股都唔會一支箭咁飆上去，此起彼落因住嚟玩，所以指數變動唔大，好似恒指昨日主要係幾十點上落，收報22949點，升51點；國企指數收報9759點，升32點，成交605億元。MSCI明晟主席費爾南德茲接受路透訪問時指，關注內地資本管制情況，若內地進一步實施資本管制，在憂慮內地限制資金撤出的情況下，A股獲完全納入MSCI指標指數進度或停止。去年6月，MSCI連續三年決定不將A股納入MSCI新興市場指數， MSCI預期農曆新年後，將與內地官員商討是否將A股納入「摩指」事宜，不過睇嚟內地經過前兩年教訓，加上人民幣匯價仲係要維穩，內地官員態度都已經唔敢咁進取，由於期望唔係咁大，所以消息暫時唔見到有好大反應。
電視廣播用40億元回購
市後電視廣播(511) 公佈，美銀美林將代表公司提出一項要約，按每股30.5元購回最多1.38億股股份，相當於已發行股本的約31.51%。回購價較受股份今日收市價26.6元溢價約14.7%。倘要約獲全面接納，將令公司向接納股東支付42.09億元。倘若建議回購計劃全額完成，已發行股本將由4.38億股下降至3億股，由大股東陳國強、王雪紅及黎瑞剛的持股量將由現在的26%，增至37.96%，至於方逸華則持股量將由3.9%增至5.7%，上述一致行動人士於TVB持股權將由29.9%增至43.66%，相關股東申請清洗豁免，上述股東將變相增持TVB股權。電視廣告生意難做，咁搞吓財技都算係一個應變嘅辦法啦。
陸羽仁
金融High Tea 舊文
來源 source: http://hdfin.stheadline.com
